საქართველომ 3 თვეში პომიდვრის იმპორტში $5.29 მლნ გადაიხადა - სად ვყიდულობთ/ვყიდით?

2026 წლის პირველ კვარტალში, საქართველოში პომიდვრის იმპორტი შემცირდა, თუმცა ფასები გაიზარდა.

ოფიციალური მონაცემებით, იანვარ-მარტში ქვეყანამ $5.29 მლნ-ის ღირებულების 7 242 ტონა პომიდორი შეიძინა, მაშინ როცა 2025 წლის ანალოგიურ პერიოდში იმპორტი $5.36 მლნ-ს და 7 522 ტონას შეადგენდა. შედეგად, იმპორტის ღირებულება 1.1%-ით, ხოლო მოცულობა 3.7%-ით არის შემცირებული.

მიუხედავად ამისა, ერთ ტონა პომიდორზე გადახდილი საშუალო ფასი გაიზარდა. თუ 2025 წლის პირველ კვარტალში 1 ტონა საშუალოდ 712 დოლარი ღირდა, 2026 წელს ეს მაჩვენებელი 731 დოლარამდე გაიზარდა, რაც დაახლოებით 2.6%-იან გაძვირებაზე მიუთითებს.

იმპორტის სტრუქტურაში კვლავ დომინირებს თურქეთი, საიდანაც საქართველოში $4 მლნ-ის ღირებულების 5 644 ტონა პომიდორი შემოვიდა. მას მოსდევს თურქმენეთი ($858 ათასი, 1 053 ტონა), ირანი ($231 ათასი, 334 ტონა), აზერბაიჯანი ($137 ათასი, 199 ტონა) და იორდანია ($6 ათასი, 10 ტონა).

რაც შეეხება ექსპორტს, 2026 წლის პირველ კვარტალში საქართველოდან პომიდვრის ექსპორტი ღირებულებაში გაიზარდა, თუმცა მოცულობა შემცირდა. კერძოდ, იანვარ-მარტში ექსპორტმა $1.49 მლნ და 973 ტონა შეადგინა, მაშინ როცა 2025 წლის ანალოგიურ პერიოდში $1.36 მლნ და 1 004 ტონა იყო. შესაბამისად, ექსპორტის ღირებულება 10.4%-ით გაიზარდა, ხოლო მოცულობა 3%-ით შემცირდა, რაც მიუთითებს, რომ ქართული პომიდვრის ფასი საერთაშორისო ბაზრებზე გაიზარდა.

ქართული პომიდვრის მთავარი საექსპორტო ბაზარი სომხეთია, სადაც $1.36 მლნ-ის ღირებულების 848 ტონა პროდუქცია გავიდა. ექსპორტი განხორციელდა ასევე რუსეთში - $142 ათასი, 125 ტონა.