საქართველოს ალექსანდრე ვუჩიჩი ეწვევა - როგორია ეკონომიკური ურთიერთობები სერბეთთან?
დღეს, 15 ივნისს, საქართველოს ოფიციალური ვიზიტით სერბეთის რესპუბლიკის პრეზიდენტი ალექსანდრ ვუჩიჩი მეუღლესა და სახელმწიფო დელეგაციასთან ერთად ეწვევა. პრეზიდენტის სასახლეში დაგეგმილი ოფიციალური დახვედრის შემდეგ, იგი მიხეილ ყაველაშვილი შეხვდება, სადაც მხარეები ორმხრივი თანამშრომლობისა და პარტნიორობის გაღრმავების საკითხებს განიხილავენ.
bm.ge გთავაზობთ ორ ქვეყანას შორის სავაჭრო-ეკონომიკურ ურთიერთობებს ოფიციალური წყაროების მიხედვით
საქართველო-სერბეთს შორის სავაჭრო ბრუნვა გაზრდილია. ოფიციალური მონაცემებით, 2025 წლის იანვარ-დეკემბერში ბრუნვამ 20.2 მლნ აშშ დოლარი შეადგინა, მაშინ როცა 2024 წლის ანალოგიურ პერიოდში ეს მაჩვენებელი 16.7 მლნ აშშ დოლარს უდრიდა. შედეგად, ორ ქვეყანას შორის სავაჭრო ბრუნვა წლიურად 21.2%-ით გაიზარდა.
რას ვყიდულობთ სერბეთიდან?
საქართველომ მიმდინარე წლის ოთხ თვეში სერბეთიდან ძირითადად თამბაქოს ნაწარმი შეიძინა - მათ შორის სიგარები, სიგარილები და სიგარეტები, რომელთა ღირებულებამ 2.2 მლნ აშშ დოლარი შეადგინა. იმპორტის მნიშვნელოვან ნაწილს ასევე შეადგენს მცენარეული მასალა და ნერგები, მათ შორის სოკოს მიცელიუმი - 630 ათასი დოლარის მოცულობით.
საგულისხმოა მინერალური და ქიმიური სასუქების იმპორტიც, რომლის ღირებულებამ 593 ათასი დოლარი შეადგინა. ამასთან, ქვეყანაში შემოდის ნავთობი და ნავთობპროდუქტებიც - 348 ათასი დოლარის მოცულობით. იმპორტის სტრუქტურაში ასევე ფიქსირდება ელექტრო მოწყობილობები მაღალი ძაბვის სისტემებისთვის (342 ათასი დოლარი), ქაღალდი და მუყაო (301 ათასი დოლარი), ცხოველების საკვები (182 ათასი დოლარი), ელექტრო წყალგამახურებლები (161 ათასი დოლარი), კონსერვირებული მცენარეული პროდუქტები (144.9 ათასი დოლარი) და სხვა საკვები პროდუქტები (144.4 ათასი დოლარი).
რას ვყიდით სერბეთში?
საქართველომ წელს 4 თვეში სერბეთში ყველაზე მეტად მცენარეული წარმოშობის სათრიმლავი ექსტრაქტები და ტანინები გაყიდა - ამ კატეგორიაში ექსპორტი 1.4 მლნ დოლარს შეადგენს. გარდა ამისა, მცირე მოცულობით გავყიდეთ ნავთობპროდუქტები (69 ათასი დოლარი), ხის მასალაზე დაფუძნებული პროდუქტები, როგორიცაა ფანერა და პანელები (31 ათასი დოლარი), მინერალური და მტკნარ წყლები (19 ათასი დოლარი) და სხვადასხვა ტიპის ტექნოლოგიურ დანადგარებს (7.7 ათასი დოლარი).