საქართველოს აქვს თანმიმდევრული და მტკიცე პოზიცია უკრაინის მიმართ - მაკა ბოჭორიშვილი

საგარეო საქმეთა მინისტრმა, მაკა ბოჭორიშვილმა უკრაინელ კოლეგასთან და პრეზიდენტთან გამართული შეხვედრების შესახებ ისაუბრა. მინისტრის თქმით, მხარეებმა ორ ქვეყანას შორის არსებული ურთიერთობები, საერთო გამოწვევები და თანამშრომლობის გაღრმავების პერსპექტივები განიხილეს.

ბოჭორიშვილის განცხადებით, საქართველოს პოზიცია უკრაინის მხარდაჭერის საკითხში მტკიცე და თანმიმდევრულია, თუმცა თბილისი საპასუხო ნაბიჯებს კიევისგანაც ელოდება.

„მქონდა საუბარი უკრაინელ კოლეგასთან, ასევე პრეზიდენტთან. ჩვენ ვისაუბრეთ ორ ქვეყანას შორის არსებულ ურთიერთობებსა და გამოწვევებზეც, რომლებიც ჩვენს შორის არსებობს. ხაზი გავუსვით თანამშრომლობის შემდგომი განვითარების მნიშვნელობას. მთელი ამ ხნის განმავლობაში საქართველოს აქვს თანმიმდევრული და მტკიცე პოზიცია უკრაინის მხარდაჭერასა და დამოკიდებულებაში. რა თქმა უნდა, ჩვენთვის მნიშვნელოვანია, რომ უკრაინული მხრიდანაც იგივე დამოკიდებულება ვიხილოთ.

შეხვედრა წინასწარ არ ყოფილა დაგეგმილი, ის სწორედ ამ ფორმატის ფარგლებში, უკრაინული მხარის ინიციატივით შედგა და რამდენიმე წუთს გასტანა. ჩვენ მოვახერხეთ, რომ შევხებოდით ყველა მნიშვნელოვან საკითხს, რომელიც ორ ქვეყანას შორის არსებულ ურთიერთობებს უკავშირდება", - განაცხადა ბოჭორიშვილმა.

მისივე თქმით, შეხვედრაზე ასევე ისაუბრეს დიპლომატიური ურთიერთობების აღდგენაზე. უკრაინას 2022 წლიდან საქართველოში ელჩი არ ჰყავს.

„საუბარი შეეხო იმასაც, რომ ორ ქვეყანას შორის ურთიერთობებში დიპლომატიურ კავშირებს, მათ შორის ქვეყნებში ელჩების ყოფნას, დიდი მნიშვნელობა აქვს. ვნახოთ, როგორ განვითარდება მოვლენები. კიდევ ერთხელ აღვნიშნავ, რომ საქართველოს ამ დროის განმავლობაში უკრაინის მიმართ მტკიცედ ჩამოყალიბებული პოზიცია აქვს, რაც არაერთხელ გამოგვიხატავს ყველა შესაძლო საერთაშორისო ფორმატში. რა თქმა უნდა, მნიშვნელოვანია, რომ ეს ურთიერთობები ურთიერთპატივისცემაზე იყოს დაფუძნებული", - განაცხადა ბოჭორიშვილმა და დასძინა, რომ ორმხრივ შეხვედრაზე სანქციებზე საუბარი არ ყოფილა.

სომხეთში EPC-ის სამიტის ფარგლებში, პრემიერი ირაკლი კობახიძე და ვოლოდიმირ ზელენსკი ერთმანეთს შეხვდნენ. შეხვედრას ასევე ესწრებოდნენ მაკა ბოჭორიშვილი და ანდრი სიბიჰა.