საქართველოს ბიზნეს ასოციაციის განცხადება თემურ უგულავას გარდაცვალებასთან დაკავშირებით
საქართველოს ბიზნეს ასოციაცია ღრმა მწუხარებას გამოთქვამს გამორჩეული ქართველი ბიზნესმენის, ჩვენი წევრი კომპანიის „აჭარა ჯგუფის“ დამფუძნებლის, თემურ უგულავას გარდაცვალების გამო.
თემურ უგულავა იყო თანამედროვე ქართული ბიზნესის ერთ-ერთი გამორჩეული წარმომადგენელი, რომელმაც განსაკუთრებული და ფასდაუდებელი წვლილი შეიტანა საქართველოში სტუმარმასპინძლობის, ტურიზმისა და ურბანული განვითარების თანამედროვე სტანდარტების დამკვიდრებაში.
მისი ხედვა, ინოვაციური მიდგომები და გაბედული პროექტები არა მხოლოდ წარმატებული ბიზნესსაქმიანობის, არამედ ქვეყნის კულტურული და ეკონომიკური ტრანსფორმაციის მნიშვნელოვანი ნაწილი გახდა. თემურ უგულავას სახელს უკავშირდება არაერთი საერთაშორისო აღიარების მქონე პროექტი, რომლებმაც საქართველო მსოფლიო რუკაზე ღირსეულად წარმოაჩინა, ქვეყნის საინვესტიციო და ტურისტული მიმზიდველობა გააძლიერა და ახალი ხარისხობრივი სტანდარტი დაამკვიდრა ბიზნესის განვითარების სფეროში.
თემურ უგულავა გამოირჩეოდა შემოქმედებითი აზროვნებით, მაღალი პროფესიონალიზმითა და იმ ღირებულებებისადმი ერთგულებით, რომლებიც პროგრესსა და განვითარებას ემსახურება. მისი საქმიანობა და მემკვიდრეობა მომავალ თაობებს კიდევ მრავალი წლის განმავლობაში შთააგონებს.
მისი გარდაცვალება უდიდესი დანაკარგია არა მხოლოდ ქართული ბიზნეს საზოგადოებისთვის, არამედ მთელი ქვეყნისთვის.
საქართველოს ბიზნეს ასოციაცია გულწრფელ სამძიმარს უცხადებს თემურ უგულავას ოჯახს, ახლობლებს, მეგობრებსა და „აჭარა ჯგუფის“ თითოეულ თანამშრომელს. ამ მძიმე წუთებში ვიზიარებთ მათ ტკივილს და პატივს მივაგებთ ადამიანის ხსოვნას, რომელმაც მნიშვნელოვანი კვალი დატოვა საქართველოს თანამედროვე ეკონომიკურ და საზოგადოებრივ განვითარებაში.