საქართველოს ნავთობისა და გაზის მარაგების შესასწავლად მთავრობამ International Geoscience Services დაიქირავა

საქართველოს ნავთობისა და გაზის სახელმწიფო სააგენტო ბრიტანულ კომპანია International Geoscience Services (IGS)-თან 45 205 აშშ დოლარის ღირებულების საკონსულტაციო მომსახურების შესყიდვას გეგმავს. მომსახურება საქართველოს ეროვნული გეომეცნიერული პროგრამის ფარგლებში ახალი საჰაერო გეოფიზიკური კვლევებისთვის ტექნიკური დავალებების მომზადებას ითვალისწინებს.

საქართველოს მთავრობის 28 სექტემბრის განკარგულებით, სააგენტოს მიეცა შესაძლებლობა, აღნიშნული მომსახურება გამარტივებული შესყიდვის გზით შეიძინოს. მთავრობის გადაწყვეტილებაში აღნიშნულია, რომ ეს საჭიროა ეროვნული გეომეცნიერული პროგრამის შემდგომი ეტაპების დროულად განხორციელებისთვის და სახელმწიფოებრივი და საზოგადოებრივი მნიშვნელობის ღონისძიების შეზღუდულ ვადებში შეუფერხებლად ჩატარებისთვის.

სააგენტოს მიერ სახელმწიფო შესყიდვების ეროვნულ სააგენტოში წარდგენილი დოკუმენტის მიხედვით, ეროვნული გეომეცნიერული პროგრამის მიზანია საქართველოში არსებული გეოლოგიური და გეოფიზიკური მონაცემების ერთიან სისტემაში გაერთიანება, მათი ახალი საჰაერო გეოფიზიკური კვლევებით შევსება და ერთიანი ეროვნული გეომეცნიერული სისტემის შექმნა. სააგენტოს განცხადებით, მიღებული მონაცემები გამოყენებული იქნება ბუნებრივი რესურსების მართვის, ინფრასტრუქტურული დაგეგმვის, გეოლოგიური საფრთხეების შეფასების, სამეცნიერო კვლევისა და საინვესტიციო გარემოს გაუმჯობესებისთვის.

პროგრამის ფარგლებში სააგენტომ უკვე მოამზადა „Georgia National Geoscience Programme - Executive White Paper“, ჩაატარა საერთაშორისო ტექნიკური კონსულტაციები და ჩამოაყალიბა პროგრამის ძირითადი კონცეფცია. შემდეგ ეტაპზე დაგეგმილია კონცეფციის კონკრეტულ, შესყიდვისთვის მზა ტექნიკურ დავალებებად (TOR) გარდაქმნა.

ტექნიკური დავალებების მოსამზადებელი კომპანიის შერჩევამდე სააგენტომ საერთაშორისო ბაზრის კვლევა ჩაატარა. განხილული იყო გაერთიანებული სამეფოს IGS, აშშ-ის Woolpert და საფრანგეთის Viridien, ყოფილი CGG. სრული ტექნიკურ-კომერციული შეთავაზებები სააგენტომ IGS-ისა და Woolpert-ისგან მიიღო, ხოლო Viridien-მა შეთანხმებულ ვადაში საბოლოო წინადადება არ წარადგინა.

IGS-ის შეთავაზება ოთხი მიმართულებისთვის ტექნიკური დავალებების მომზადებას მოიცავს: საჰაერო გეოფიზიკური კვლევა, მონაცემთა ინტეგრირებული ინტერპრეტაცია, დამოუკიდებელი ხარისხის კონტროლი (QA/QC) და ეროვნული გეომეცნიერული მონაცემთა პლატფორმა. კომპანიის მიერ სამუშაო ვერსიების მომზადების ვადა დაახლოებით ოთხი კვირაა, მომსახურების ღირებულება კი 45 205 დოლარს შეადგენს.

Woolpert-ის შეთავაზების ღირებულება 64 ათასი დოლარი იყო. სამუშაო ვერსიის მომზადებისთვის კომპანიას ასევე დაახლოებით ოთხი კვირა, ხოლო საბოლოო დოკუმენტისთვის დამატებით ორი კვირა ჰქონდა გათვალისწინებული. სააგენტოს შეფასებით, IGS-ის შეთავაზება Woolpert-ის წინადადებაზე 18 795 დოლარით, ანუ დაახლოებით 29%-ით ნაკლებია.

სააგენტო IGS-ის შერჩევის მიზეზად ფასის გარდა კომპანიის გამოცდილებასაც ასახელებს. უწყების ინფორმაციით, კომპანიას ეროვნული მასშტაბის საჰაერო გეოფიზიკურ პროგრამებზე, ტექნიკური სპეციფიკაციებისა და TOR-ების მომზადებაზე, დამოუკიდებელ QA/QC-სა და საერთაშორისო პროექტების ზედამხედველობაზე მუშაობის გამოცდილება აქვს.

სააგენტოს განმარტებით, დამატებითი სატენდერო პროცედურის ჩატარება პროგრამის განხორციელების ვადებს გაახანგრძლივებს და გადასწევს როგორც ტექნიკური დავალებების დასრულებას, ისე შემდგომ საერთაშორისო შესყიდვასა და საჰაერო გეოფიზიკური კვლევების დაწყებას. სწორედ ამ მიზეზით ითხოვა უწყებამ IGS-ისგან მომსახურების გამარტივებული შესყიდვის გზით მიღება.