საქართველოში ელექტროენერგია მესამედ სისტემურად გაითიშა

საქართველოში ელექტროენერგია სისტემურად გაითიშა. ეს რიგით მესამე შემთხვევაა, 24-25 ივლისს დაფიქსირებული შემთხვევების შემდეგ.

არსებული ინფორმაციით, ელექტროენერგია არ მიეწოდება როგორც დედაქალაქს, ისე რეგიონებს.

სახელმწიფო ელექტროსისტემის ვებგვერდის თანახმად, ელექტროენერგიის გათიშვის შედეგად, მოხმარება 2.1 გიგავატიდან 502 მეგავატამდე დაეცა.

BMG არკვევს, ამჟამად რატომ გაითიშა ქვეყანაში ელექტროენერგიის მიწოდება.

შეგახსენებთ, 24 ივლისს ქვეყნის მასშტაბით ელექტროენერგიის მიწოდება ავარიულად შეწყდა. შეფერხებები 25 ივლისსაც დაფიქსირდა. მომხდართან დაკავშირებით სემეკი ადმინისტრაციულ მოკვლევას აწარმოებს, ხოლო საქართველოს სახელმწიფო უსაფრთხოების სამსახურმა გამოძიება საბოტაჟის მუხლით დაიწყო.

სემეკის სამუშაო ჯგუფის პირველადი შეფასებით, 24 ივლისს საქართველოს ენერგოსისტემა პარალელურ რეჟიმში მუშაობდა აზერბაიჯანის ენერგოსისტემასთან, თუმცა დაახლოებით 00:10 საათზე მოხდა ორი ენერგოსისტემის გამიჯვნა, რის შემდეგაც საქართველოს ენერგოსისტემა იზოლირებულ რეჟიმში დარჩა. კომისიის ინფორმაციით, დაიწყო სიხშირისა და ძაბვის ვარდნა, რასაც კასკადური გამორთვები და საბოლოოდ ენერგოსისტემის სრული ჩაქრობა მოჰყვა.