სარკინიგზო ინფრასტრუქტურის, როგორც სტრატეგიული აქტივის, გასხვისება იზღუდება - თამარ იოსელიანი

საქართველოს პარლამენტი „საქართველოს სარკინიგზო კოდექსში“ ცვლილებებს განიხილავს, რომლის მიზანიც სახელმწიფო საკუთრებაში არსებული ან სახელმწიფოს მონაწილეობით მოქმედი საწარმოების ბალანსზე რიცხული მაგისტრალური სარკინიგზო ლიანდაგებისა და მათი დამცავი ზონების გასხვისების შეზღუდვაა.

საკანონმდებლო ინიციატივა საქართველოს ეკონომიკისა და მდგრადი განვითარების სამინისტრომ მოამზადა და დაჩქარებული წესით განხილვისთვის პარლამენტში გასულ კვირაში დაარეგისტრირა. პროექტის მიხედვით, მთავრობის მიერ განსაზღვრული მოქმედი მაგისტრალური სარკინიგზო ლიანდაგისა და მისი დამცავი ზონის მესამე პირებისთვის საკუთრებაში გადაცემა დაუშვებელი იქნება. გამონაკლისი მხოლოდ ის შემთხვევაა, როდესაც აღნიშნული ქონება სახელმწიფოს 50%-ზე მეტი წილობრივი მონაწილეობით მოქმედი საწარმოს კაპიტალში შევა.

პარლამენტში კანონპროექტის საკომიტეტო განხილვისას ეკონომიკისა და მდგრადი განვითარების მინისტრის მოადგილემ, თამარ იოსელიანი, განაცხადა, რომ ცვლილებების მიზანი სარკინიგზო ინფრასტრუქტურაზე სახელმწიფოს სტრატეგიული კონტროლის შენარჩუნებაა.

მისი თქმით, ამ ეტაპზე მაგისტრალური სარკინიგზო ლიანდაგები და მათი დამცავი ზონები სახელმწიფო საწარმოთა საკუთრებაშია, რის შედეგადაც აღნიშნულ აქტივებზე სახელმწიფო კონტროლი უკვე უზრუნველყოფილია.

„იმისათვის, რომ არსებული მდგომარეობა შენარჩუნდეს, მნიშვნელოვანია საკანონმდებლო დონეზეც იყოს ასახული, რომ დაუშვებელია მაგისტრალური სარკინიგზო ლიანდაგის და მისი დამცავი ზონის მესამე პირებისთვის საკუთრებაში გადაცემა“, – განაცხადა იოსელიანმა.

კანონპროექტი ასევე განსაზღვრავს „მაგისტრალური სარკინიგზო ლიანდაგის“ ცნებას. ცვლილების მიხედვით, ასეთად ჩაითვლება ლიანდაგი, რომელიც სასაზღვრო სარკინიგზო გადასასვლელებს, სარკინიგზო სადგურებსა და საზღვაო ნავსადგურებს შორის ტვირთის გადაზიდვას ან მგზავრთა გადაყვანას ემსახურება.

მინისტრის მოადგილის განმარტებით, მოქმედი მაგისტრალური ლიანდაგების სახელმწიფო ან სახელმწიფო საწარმოს საკუთრებაში შენარჩუნება აუცილებელია, რადგან სწორედ ამ ინფრასტრუქტურაზე ხორციელდება საერთაშორისო სატვირთო და სამგზავრო მიმოსვლა საქართველოს ტერიტორიაზე.