საწვავის გაძვირების გამო თბილისში ტაქსით მგზავრობაც გაძვირდა

საწვავის გაძვირების გამო საქართველოში არამხოლოდ საქალაქთაშორისი მგზავრთგადაყვანა გაძვირდა, არამედ ტაქსის სერვისიც. კომპანიების პარტნიორი მძღოლების ნაწილი ამბობს, რომ ტაქსით მგზავრობის ტარიფი დაახლოებით 15%-ით გაიზარდა.

“ცოტა მოიმატა ტაქსის მომსახურების ფასმა. მიზეზი საწვავის ღირებულებაა, რა თქმა უნდა. ფასი დაახლოებით 10-15%-ით გაიზარდა”,-აცხადებს bm.ge-სთან ერთ-ერთი ტაქსის მძღოლი.

საწვავის ხარჯების გათვალისწინებით მძღოლების ანაზღაურებას გადახედა “იანდექსმაც”. კომპანიის ერთ-ერთი პარტნიორი აცხადებს, რომ თუ საცობებს არ გავითვალისწინებთ, მგზავრობის ტარიფი თითქმის უცვლელი დარჩა, თუმცა გაიზარდა მძღოლების ანაზღაურების პროცენტი.

“ტარიფები თითქმის არ გაზრდილა, სამაგიეროდ კომპანიამ გაითვალისწინა და თანხები მოგვიმატა 20-24%-მდე”,-აცხადებს ერთ-ერთი მძღოლი.

როგორც ცნობილია, რამდენიმე დღის წინ ტაქსის მომსახურების ტარიფი გაზარდა კომპანია Bolt-მა. კომპანიამ ოფიციალურად განაცხადა, რომ საწვავისა და ავტომობილის მოვლის ხარჯების ზრდის გამო 18 სექტემბრიდან მგზავრობის ტარიფები ყველა კატეგორიაში 12%-ით გაიზრდებოდა.

აღსანიშნია, რომ ბოლო 2 თვეში საქართველოში საწვავი დაახლოებით 20%-ით გაძვირდა. დღეის მდგომარეობით, ბრენდირებულ ბენზინგასამართ სადგურებზე რეგულარის ფასი 3.90 თეთრამდე ღირს, დიზელის ღირებულება კი 4,70 თეთრს აჭარბებს.