საუდის არაბეთი ელექტროენერგიის საწარმოებლად ნავთობპროდუქტების მოხმარებას ზრდის

ახლო აღმოსავლეთში მიმდინარე ომით გამოწვეული კრიზისის ფონზე, საუდის არაბეთი ზაფხულის სეზონზე ელექტროენერგიის გამომუშავებისთვის იმპორტირებული ნავთობპროდუქტების მოხმარებას მნიშვნელოვნად გაზრდის.

ანალიტიკოსების შეფასებით, აღნიშნული გადაწყვეტილება ბუნებრივი აირის მოპოვების შემცირებას უკავშირდება. ირანის მიერ ჰორმუზის სრუტის ბლოკადის გამო, სამეფომ ნავთობის ექსპორტის შეფერხების თავიდან ასაცილებლად მოპოვება დღეში 3 მილიონ ბარელზე მეტით შეამცირა, რამაც თანმდევი ბუნებრივი აირის წარმოების კლება გამოიწვია.

როგორც ირკვევა, ელექტროსადგურებში გაზის ჩასანაცვლებლად კომპანიამ საწვავი მაზუთის იმპორტი აპრილის თვეში წლიურად 86%-ით გაზარდა და დღეში 360,000 ბარელს გაუტოლა. Vortexa-ს მონაცემებით, რესურსის უდიდესი ნაწილი იმ ტერმინალებში ჩაიტვირთა, რომლებიც ელექტროსადგურებსა და წყლის გამტკნარების ობიექტებს ამარაგებენ.

მნიშვნელოვანია ითქვას, რომ კომპანია შიდა მოხმარებისთვის უპირატესობას მაზუთს ანიჭებს, რადგან ის ადგილობრივ ნედლ ნავთობზე იაფია, ხოლო მოპოვებულ ნედლეულს, ძირითადად Arab Light-ის მარკას, ექსპორტისთვის ინახავს.

შეგახსენებთ, რომ საუდის არაბეთში ელექტროენერგიაზე მოთხოვნა პიკს ივლისსა და აგვისტოში, კონდიცირების სისტემების ინტენსიური მუშაობის გამო აღწევს. ენერგეტიკული ანალიტიკოსების შეფასებით, ჰორმუზის სრუტეში ნაოსნობის აღდგენა ეტაპობრივად, მიმდინარე წლის ზაფხულის ბოლომდეა მოსალოდნელი, შესაბამისად, პიკური მოთხოვნა და ჰორმუზის სრუტის შეფერხება ზუსტად ერთ პერიოდს ემთხვევა, რაც არაბეთს ამ უჩვეულო გადაწყვეტილებისკენ უბიძგებს.