საუდის არაბეთმა აზიისთვის ნავთობის ფასი 6-წლიან მინიმუმამდე შეამცირა

საუდის არაბეთმა ნოემბრის თვეში აზიელი მომხმარებლებისთვის ნავთობის ოფიციალური გასაყიდი ფასი მოულოდნელად შეამცირა.

არსებული ინფორმაციით, Saudi Aramco-მ Arab Light-ის მარკის ნედლ ნავთობზე ფასდაკლება წინა თვესთან შედარებით $3-ით გაზარდა და ომანისა და დუბაის საშუალო მაჩვენებელზე $5-ით დაბალ ნიშნულზე განსაზღვრა.

აღსანიშნავია, რომ საუდის არაბეთის სახელმწიფო კომპანიამ ეს გადაწყვეტილება ახლო აღმოსავლეთში მიმდინარე ომის გამო საზღვაო გადაზიდვების მკვეთრ გაძვირებას დაუკავშირა. Saudi Aramco-ს წარმომადგენლის ცნობით, კომპანიამ ტარიფების შემცირება მყიდველებისთვის გაზრდილი ლოგისტიკური ხარჯების კომპენსირების მიზნით გადაწყვიტა.

ინფორმაციისთვის, სპარსეთის ყურიდან ჩინეთის მიმართულებით 2 მილიონი ბარელი ნავთობის გადამზიდი ტანკერის დაქირავება დღიურად უკვე $1.2 მილიონამდე არის გაზრდილი, რაც იმპორტიორებზე ზეწოლას ზრდის და მათ ახლო აღმოსავლეთის მიმართ ინტერესს უმცირებს. შედარებისთვის, გასულ წელს დღიური ტარიფი დღეში მხოლოდ $80,000-ს შეადგენდა.