საზღვაო ტრანსპორტის სააგენტო ინგლისის სრუტეში დაკავებულ ტანკერზე საქართველოს მოქალაქეების ყოფნას ეხმაურება
საქართველოს საზღვაო ტრანსპორტის სააგენტო განცხადებას ავრცელებს ბრიტანეთის ხელისუფლების მიერ ინგლისის სრუტეში ნავთობტანკერ SMYRTOS-თან დაკავშირებით განხორციელებულ სამართალდამცავ ღონისძიებებზე.
ბრიტანეთის მიერ დაკავებულ რუსული „ჩრდილოვანი ფლოტის“ ტანკერზე საქართველოს მოქალაქეებიც იმყოფებოდნენ
უწყების ცნობით, გემზე ეკიპაჟის 24 წევრიდან საქართველოს 3 მოქალაქეა, თუმცა ისინი ქართული საკრუინგო კომპანიების გვერდის ავლით იყვნენ დასაქმებულები. სააგენტო ხაზგასმით აღნიშნავს, რომ მკაცრად აკონტროლებს საერთაშორისო სანქციების შესრულებას.
საზღვაო ტრანსპორტის სააგენტოს განცხადებას უცვლელად გთავაზობთ:
„ბრიტანეთის ხელისუფლების მიერ ინგლისის სრუტეში ნავთობტანკერ SMYRTOS (IMO 9389100)-თან დაკავშირებით განხორციელებული სამართალდამცავი ღონისძიებების შესახებ გავრცელებული ინფორმაციის საფუძველზე, საქართველოს საზღვაო ტრანსპორტის სააგენტომ დაუყოვნებლივ დაიწყო საკითხის შესწავლა თავისი კომპეტენციის ფარგლებში.
გაერთიანებული სამეფოს ხელისუფლების მიერ მოწოდებული ინფორმაციით, ამ ეტაპზე გემზე იმყოფება ეკიპაჟის 24 წევრი, რომელთაგანაც სამი საქართველოს მოქალაქეა.
ბრიტანეთის ხელისუფლების ინფორმაციით ყველა მეზღვაური უსაფრთხოდაა და მათ ჯანმრთელობას საფრთხე არ ემუქრება.
ხაზგასმით აღვნიშნავთ, რომ საქართველოს მოქმედი კანონმდებლობა და სააგენტოს მარეგულირებელი აქტები საკრუინგო კომპანიებს ავალდებულებს განახორციელონ მკაცრი სანქციური შემოწმება და კრძალავს მეზღვაურთა დასაქმებას იმ გემებზე ან გემთმფლობელებთან, რომლებიც ექვემდებარებიან გაეროს, ევროკავშირის, ამერიკის შეერთებული შტატების ან გაერთიანებული სამეფოს სანქციებს.
სააგენტომ გადაამოწმა საქართველოში მოქმედი და აღიარებული საკრუინგო და მეზღვაურთა დასაქმების კომპანიების მონაცემები. ჩატარებული შემოწმების შედეგად, აღნიშნული გემი არ იდენტიფიცირდა არცერთი აღიარებული ქართული საკრუინგო კომპანიის დასაქმების, რეკრუტირების ან მეზღვაურთა განთავსების ჩანაწერებში.