SK Hynix-მა Samsung-ს გადაასწრო და სამხრეთ კორეის ყველაზე ძვირად ღირებული საჯარო კომპანია გახდა

SK Hynix-მა Samsung Electronics-ს გადაასწრო და სამხრეთ კორეის ყველაზე მაღალი საბაზრო კაპიტალიზაციის მქონე საჯარო კომპანია გახდა. ეს დრამატული შემობრუნებაა ჩიპების მწარმოებლისთვის, რომელიც ორი ათწლეულის წინ ვალების გამო გაკოტრების პირას იყო.

კომპანია, რომელიც ამჟამად მაღალი გამტარუნარიანობის მეხსიერების (HBM) ჩიპების დომინანტი მიმწოდებელია ისეთი გიგანტებისთვის, როგორებიც Nvidia და Google არიან, ხელოვნური ინტელექტის გლობალური ბუმის ერთ-ერთი ყველაზე დიდი ბენეფიციარი გახდა. ამან მიმდინარე წელს მისი აქციების ფასის 340%-ზე მეტი ზრდა გამოიწვია, რის შედეგადაც კომპანიის საბაზრო ღირებულებამ როგორც Samsung-ს, ისე Micron-ს გადააჭარბა.

როგორ გადაასწრო SK Hynix-მა Samsung-ს და გახდა ყველაზე ძვირად ღირებული კომპანია?

SK Hynix-ის - რომელიც ამჟამად მსოფლიოში მეხსიერების ჩიპების ყველაზე ძვირად ღირებული მწარმოებელია - აქციების ფასი 5.6%-ით გაიზარდა, რამაც მისი საბაზრო კაპიტალიზაცია 2 080.4 ტრილიონ ვონამდე (1.35 ტრილიონი დოლარი) გაზარდა. ამავდროულად, Samsung-ის აქციები 0.14%-ით შემცირდა და მისმა საბაზრო ღირებულებამ, პრივილეგირებული აქციების გარეშე, 2 066.7 ტრილიონი ვონი შეადგინა.

ხელოვნურმა ინტელექტმა გლობალური ნახევარგამტარების ინდუსტრია სრულად შეცვალა. სპეციალიზებული მეხსიერების ჩიპები ჩვეულებრივი სამომხმარებლო საქონლიდან უმნიშვნელოვანეს კომპონენტად გადაიქცა იმ ინფრასტრუქტურისთვის, რომელზეც მოწინავე AI მოდელები მუშაობენ.

SK Hynix ძირითადად მეხსიერების ჩიპებზეა ფოკუსირებული, მაშინ როდესაც Samsung ასევე ლოგიკურ ჩიპებსა და სამომხმარებლო ელექტრონიკას - სმარტფონებსა და ტელევიზორებს - აწარმოებს. Samsung ლიდერის პოზიციას 2000 წლიდან ინარჩუნებდა.

Samsung-მა განცხადებაში აღნიშნა, რომ მისი საბაზრო კაპიტალიზაციის გაანგარიშებისას პრივილეგირებული აქციებიც უნდა იქნას გათვალისწინებული. ამ აქციების ჩათვლით, კომპანიის ღირებულებამ ბირჟის დახურვისას 2,246.4 ტრილიონი ვონი (1.46 ტრილიონი დოლარი) შეადგინა.

SK Hynix-ის წარმატება სამხრეთ კორეის კორპორაციულ ისტორიაში ერთ-ერთი ყველაზე მასშტაბური შემობრუნების კულმინაციაა.

2002 წელს იმდროინდელი Hynix Semiconductor, აგრესიული გაფართოების კამპანიის დროს დაგროვილი ვალების გამო, Micron-ისთვის მიყიდვის პირას იყო. საბოლოოდ, შეთანხმება ჩაიშალა და კომპანია თითქმის ათი წლის განმავლობაში კრედიტორების კონტროლის ქვეშ დარჩა.

2003 წელს მისი აქციების ფასი 135 ვონამდე დაეცა, რის გამოც მას "ერთცენტიან აქციად" მიიჩნევდნენ.

მომდევნო წლებში მისი ფინანსური მდგომარეობა მეხსიერების ჩიპების გლობალური ინდუსტრიის ტენდენციებს მიჰყვებოდა. 2023 წელს პროდუქტის ფასებზე მკვეთრმა ვარდნამ კომპანიას მძიმე დარტყმა მიაყენა, რის გამოც SK Hynix-ის წლიურმა საოპერაციო ზარალმა 7.73 ტრილიონი ვონი შეადგინა.

კომპანიამ აღდგენა ერთი წლის შემდეგ დაიწყო, როდესაც ხელოვნური ინტელექტის ბუმმა იმპულსი მისცა და ისეთმა გიგანტებმა, როგორებიც Microsoft, Google და Meta არიან, სოლიდური ინვესტიციები განახორციელეს. შედეგად, 2024 წელს კომპანიამ რეკორდული საოპერაციო მოგება - 23.5 ტრილიონი ვონი დააფიქსირა.

ანალიტიკოსები გლობალურ AI ეკოსისტემაში SK Hynix-ის ცენტრალურ როლს მიაწერენ მის გადაწყვეტილებას, HBM-ში ინვესტიციები მეხსიერების ინდუსტრიის ვარდნის პერიოდშიც კი გაეგრძელებინა. ეს არის სპეციალიზებული მეხსიერების ჩიპი, რომელშიც ფენები ვერტიკალურად არის განლაგებული, რაც უფრო სწრაფ მუშაობასა და ენერგიის ნაკლებ მოხმარებას უზრუნველყოფს.

ჩვეულებრივი მეხსიერების პროდუქტებისგან განსხვავებით, HBM ჩიპები მჭიდროდ არის ინტეგრირებული AI პროცესორებთან, რაც ბაზარზე შესვლის მნიშვნელოვნად მაღალ ბარიერებს ქმნის და მომწოდებლებს ფასების განსაზღვრის მეტ ძალაუფლებას აძლევს. 2025 წლისთვის SK Hynix-მა გლობალური HBM ბაზრის 61% დაიკავა.

SK Hynix 1983 წელს დაფუძნდა, როგორც Hyundai-ს ერთ-ერთი ქვედანაყოფი, თუმცა მოგვიანებით მას გამოეყო და საოჯახო კონგლომერატმა SK Group-მა შეისყიდა.

სააგენტო Reuters-ის ინფორმაციით, SK Hynix-ი აშშ-ში დაგეგმილი აქციების განთავსებისთვის Nasdaq-ის ბირჟას ირჩევს, რაც კომპანიის ინვესტორთა ბაზას გააფართოებს და კიდევ უფრო გაზრდის მის ცნობადობას გლობალურ ინვესტორებს შორის.