SoftBank-ის აქციების ფასი 18%-ით გაიზარდა, Nikkei 225-მა კი რეკორდულ ნიშნულს მიაღწია

მრავალდღიანი უქმეების შემდეგ იაპონიის საფონდო ბირჟამ მუშაობა განაახლა და Nikkei 225-ის ინდექსმა ისტორიულ მაქსიმუმს მიაღწია. ინვესტორების აქტივობა ხელოვნური ინტელექტის სექტორის მიმართ გლობალურმა ოპტიმიზმმა განაპირობა.

საყურადღებოა, რომ SoftBank Group-ის აქციების ფასი 18.44%-ით გაიზარდა, რაც კომპანიისთვის 2020 წლის შემდეგ საუკეთესო დღიური მაჩვენებელია. როგორც ირკვევა, ეს ნახტომი იაპონურ ბაზარზე ტექნოლოგიური აქციების მასშტაბურმა მატებამ განაპირობა. Advantest-ის აქციების ღირებულება თითქმის 7%-ით გაიზარდა, Tokyo Electron-ის ფასმა კი 9%-ს გადააჭარბა.

მნიშვნელოვანია ითქვას, რომ იაპონური ბაზრის რეკორდული მაჩვენებლები Wall Street-ზე არსებულ ტენდენციას მიჰყვება. აშშ-ში Nasdaq-ის ინდექსმა მორიგი ისტორიული ნიშნული დააფიქსირა. მასზე წარმოდგენილი AMD-ის ფასი 18.6%-ით გაიზარდა, Arm Holdings-ის მაჩვენებელმა კი 13%-ით მოიმატა.

ანალიტიკოსების შეფასებით, SoftBank-ის წარმატება OpenAI-სა და Arm-თან მის მჭიდრო პარტნიორობას უკავშირდება. როგორც ცნობილია, ბაზარი SoftBank-ს ამ ორი გიგანტის ერთგვარ საჯარო წარმომადგენლად მიიჩნევს. ინვესტორების ოპტიმიზმი მონაცემთა ცენტრების ინფრასტრუქტურაზე მოთხოვნის ზრდასაც უკავშირდება. AMD-ის პროგნოზით, ამ სექტორის ბაზრის მოცულობამ 2030 წლისთვის $120 მილიარდს შესაძლოა მიაღწიოს.

პარალელურად, ინვესტორების განწყობაზე დადებითი გავლენა გეოპოლიტიკური დაძაბულობის შემცირებამ იქონია. აშშ-სა და ირანს შორის დეესკალაციის ნიშნების ფონზე ნავთობის ფასი შემცირდა. Global X ETFs-ის სტრატეგი ბილი ლუნგი აღნიშნავს, რომ იაპონიის ბაზარზე დღევანდელი ნახტომი სამი სესიის ერთიან შედეგს ასახავს. საყურადღებოა, რომ იაპონელი ინვესტორები გლობალურ ტენდენციებს მას შემდეგ შეუერთდნენ, რაც ქვეყანაში "ოქროს კვირის" უქმეები დასრულდა.

ცნობისთვის, "ოქროს კვირა" იაპონიაში რამდენიმე სახელმწიფო დღესასწაულის ერთობლიობაა. ამ პერიოდში საფონდო ბირჟები მუშაობას დროებით წყვეტს.