სომხეთი ელექტროგადამცემი სისტემაში კარაპეტიანის წილის ნაციონალიზაციას გეგმავს

სომხეთის ხელისუფლება რუსეთში მოღვაწე სომეხი მილიარდერის, სამველ კარაპეტიანის "სომხეთის ელექტროქსელებში" (ENA) კუთვნილი აქციების ნაციონალიზაციას გეგმავს. ENA სომხეთის ელექტროგადამცემი ხაზების მთავარი ოპერატორია.

როგორც OC Media წერს, ნიკოლ ფაშინიანის მთავრობა ამის გაკეთებას სპეციალური საკანონმდებლო მექანიზმის გამოყენებით აპირებს, რაც სახელმწიფოს იმ კომპანიების ნაციონალიზაციის უფლებას აძლევს, რომლებიც საზოგადოებრივ ინტერესს უგულებელყოფენ.

მედიაში გავრცელებული ეს ინფორმაცია „სომხეთის ელექტროქსელების“ სახელმწიფოს მიერ დანიშნულმა დროებითმა მმართველმა და მმართველი პარტიის, „სამოქალაქო ხელშეკრულების“ წევრმა, რომანოს პეტროსიანმაც დაადასტურა.

მისი განცხადებით, სომხეთის მთავრობა დაიწყებს „სომხეთის ელექტროქსელების“ (ENA) აქციების საჯარო ინტერესის მქონედ გამოცხადების პროცესს, რასაც მისი ნაციონალიზაცია უნდა მოჰყვეს.

მიუხედავად იმისა, რომ სომხეთის ხელისუფლებას ოფიციალურად არ დაუსახელებია თანხა, რასაც კომპანიას გადაუხდის, „რადიო თავისუფლების“ მიერ მოპოვებული დოკუმენტებიდან ირკვევა, რომ საუბარია 23.3 მილიარდ დრამზე [დაახლოებით 59 მლნ დოლარი]. თუმცა ამ შემთხვევაში კარაპეტიანს კომპანიისთვის უნდა დაებრუნებინა ბოლო 10 წლის განმავლობაში მიღებული დივიდენდები, რაც 23.158 მილიარდ დრამს (60 მლნ დოლარს) შეადგენს.

ENA კარაპეტიანის კუთვნილი Tashir Group-ის შემადგენლობაში შედის. თავად მილიარდერი გასული წლის ივნისიდან ამჟამად შინაპატიმრობაშია. კარაპეტიანის დაკავებას წინ უძღოდა საჯარო განცხადებები, სადაც ის სომხურ ეკლესიასა და ფაშინიანს შორის არსებულ დაპირისპირებაში ეკლესიის მხარეს დადგა. სწორედ ამ მოვლენების ფონზე გამოაცხადა ფაშინიანმა, რომ დადგა ელექტროსისტემის ოპერატორის ნაციონალიზაციის დრო.