SpaceX-მა Nasdaq-ზე ისტორიული IPO-ს გამართვის განაცხადი ოფიციალურად წარადგინა

SpaceX-მა Nasdaq-ის საფონდო ბირჟაზე აქციების პირველადი საჯარო შეთავაზების, იგივე IPO-ს გამართვის მიზნით ოფიციალური განაცხადი წარადგინა. საჯაროდ გამოქვეყნებული ფინანსური დოკუმენტების თანახმად, მიმდინარე წლის პირველ კვარტალში კომპანიის შემოსავალი წლიურად 15%-ით გაიზარდა და $4.69 მილიარდი შეადგინა. შედარებისთვის, გასული წლის ანალოგიურ პერიოდში კომპანიის შემოსავალი $4.07 მილიარდს აღწევდა. საყურადღებოა, რომ SpaceX-ის კვარტალში წმინდა ზარალის სახით $4.28 მილიარდი ნახა.

რაც შეეხება სხვა დეტალებს, საჯარო ფინანსური დოკუმენტის თანახმად, კომპანიის კაპიტალურმა ხარჯებმა პირველ კვარტალში $10.1 მილიარდი შეადგინა. დასახელებული თანხიდან $7.7 მილიარდი ხელოვნური ინტელექტის მიმართულებაზე მოვიდა. გაირკვა ისიც, რომ SpaceX-ი ხელოვნური ინტელექტის გამოთვლითი სიმძლავრეების გაქირავების ბაზარზეც იწყებს სერიოზულ აქტიურობას. ის კომპანია Anthropic-ს მემფისში მდებარე Colossus 1 მონაცემთა ცენტრის რესურსებს სრულად დაუთმობს. ამ შეთანხმების ფარგლებში კი სტარტაპი 2029 წლის მაისამდე ყოველთვიურად $1.25 მილიარდს გადაიხდის.

დოკუმენტის გამოქვეყნების შემდეგ დადასტურდა ის ცნობაც, რომ თებერვალში განხორციელებული მასშტაბური შერწყმის შედეგად SpaceX-ისა და მასკის კუთვნილი სტარტაპის, xAI-ის ერთობლივი ღირებულება $1.25 ტრილიონით განისაზღვრა. საყურადღებოა, რომ კომპანია ოფიციალურ დოკუმენტაციაში მთავარ მეტოქედ OpenAI-ს ასახელებს. დოკუმენტში აღნიშნულია, რომ xAI-ის მიერ შექმნილი ჩეთბოტის, Grok-ის განახლებული მოდელი ბაზარზე სწრაფად პროგრესირებს, თუმცა პოპულარობით კვლავ ჩამორჩება ChatGPT-ს.

საჯაროდ გამოქვეყნებულმა მონაცემებმა დაადასტურა ცნობები კომპანიის მართვის სტრუქტურის შესახებ, რომლის მიხედვითაც ილონ მასკი ხმის უფლების 85%-ს აკონტროლებს. გაირკვა ისიც, რომ ამჟამად მასკის გარდა არცერთი ფიზიკური თუ იურიდიული პირი აქციების 5%-ზე მეტს არ ფლობს.

ცნობისთვის, საფონდო ბირჟაზე აქციების პირველადი საჯარო განთავსების პროცესში SpaceX-ს ფინანსურ კონსულტაციებს საინვესტიციო ბანკი Goldman Sachs-ი გაუწევს. აღსანიშნავია, რომ პროცესში Morgan Stanley, Bank of America, Citigroup-ი და JPMorgan Chase-იც მიიღებენ მონაწილეობას. საყურადღებოა, რომ საინვესტიციო წრეებისთვის აქციების წარდგენის პროცესის დაწყებას კომპანია 8 ივნისს გეგმავს.

ცნობისთვის, SpaceX-ი მასკმა 2002 წელს დააფუძნა. ამჟამად ის მართავს გლობალურ თანამგზავრულ ქსელ Starlink-ს, რომელიც დაახლოებით 10,000 თანამგზავრს აერთიანებს. კომპანიის სათავო ოფისი ტეხასის შტატის ქალაქ სტარბეისში მდებარეობს. სწორედ ამ ქალაქში იგეგმება 21 მაისს ხომალდ Starship-ის რიგით მე-12 სატესტო გაშვება.