სპარსეთის ყურეში გემების მიმოსვლა სტაბილურია - რამდენმა გემმა გადაკვეთა ჰორმუზის სრუტე?

გემების მიმოსვლის მონაცემების თანახმად, სამშაბათს ახლო აღმოსავლეთის საკვანძო - ჰორმუზისა და ბაბ-ელ-მანდების სრუტეებში - ნაოსნობის ინტენსივობა წინა დღესთან შედარებით თითქმის არ შეცვლილა.

Reuters-ის კომპანია Kpler-ის საზღვაო მონაცემებზე დაყრდნობით წერს, რომ ჰორმუზის სრუტე 8 გემმა გადაკვეთა, მათ შორის 5 ტანკერი და 3 მშრალი ტვირთმზიდი იყო, რაც წინა დღის მაჩვენებლის იდენტურია. 6 გემი (სამი ტანკერი და სამი მშრალი ტვირთმზიდი) სრუტეში შედიოდა, ხოლო ერთი გაზმზიდი და ერთი ტანკერი გამოდიოდა.

აღსანიშნია, რომ ამ საზღვაო გზით ჩვეულებრივ 130-დან 140-მდე გემი გადაადგილდებოდა მანამ, სანამ 28 თებერვალს აშშ-ის და ისრაელის ომი დაიწყებოდა ირანთან, რასაც ირანმა სრუტის ჩაკეტვით უპასუხა.

გარდა ამისა, LSEG-ისა და Kpler-ის მონაცემებით, Abu Dhabi National Oil Co-ის მიერ კონტროლირებადი თხევადი ბუნებრივი აირის (LNG) ტანკერი სამშაბათს, ჰორმუზის სრუტის გარეთ კუნძულ დასიდან წამოღებული ტვირთით კვლავ გამოჩნდა.

როგორც LSEG-ი და Kpler-ი იუწყებიან, ტანკერმა Mubaraz-მა არაბთა გაერთიანებული საამიროების კუნძული დასი 14 ივლისს მას შემდეგ დატოვა, რაც იქ ტვირთი აიღო. გემების თვალთვალის მონაცემების მიხედვით, ის სრუტის შიგნით ბოლოს 16 ივლისს დაფიქსირდა.