"სთარინგ ჯორჯია" მთავრობამ კონტრაქტების დადებამდე ბაზრის მოკვლევის ვალდებულებისგან გაათავისუფლა

"სთარინგ ჯორჯია" მთავრობამ კონტრაქტების დადებამდე ბაზრის მოკვლევის ვალდებულებისგან გაათავისუფლა - ამის შესახებ აღნიშნულია მთავრობის 18 მაისის დადგენილებაში, რომელიც კულტურის სამინისტროს დაქვემდებარებაში არსებულ სახელმწიფო კომპანიას ბაზრის მოკვლევის ვალდებულებისგან ათავისუფლებს.

"შემსყიდველი თავისუფლდება ბაზრის კვლევის ჩატარების ვალდებულებისგან მხოლოდ ღონისძიების მოსამზადებელ ან მიმდინარეობის პერიოდში დაგეგმილი შესაბამისი ღონისძიებების მომზადების ეტაპზე,"- ნათქვამია დოკუმენტში.

შპს "სთარინგ ჯორჯია" არსებული მდგომარეობითაც ოპერირებს ისე, რომ მისი კონტრაქტების უდიდესი ნაწილი არ საჯაროვდება არც თავად კომპანიის, არც სახელმწიფო შესყიდვების სააგენტოს ვებგვერდზე. მათ შორის უცნობია თუ რა თანხას უხდის კომპანია არტისტებს ჰონორარის სახით.

12 მაისს კომპანიამ ქანიე უესთის კონცერტის ბილეთების რეალიზაცია დაასრულა, სულ 70,000 ბილეთი გაიყიდა, რომლის ჯამური შემოსავალი 31.8 მილიონ ლარს აღემატება. კონცერტი 12 ივნისს იგეგმება.

ცნობისთვის, მთავრობის გადაწყვეტილებით, 2025 წლის ბოლოს შპს „სერვისი-7“ („ციცინათელა“) „სთარინგ ჯორჯიას“ შეუერთდა. მანამდე, 2025 წლის იანვარში, „სთარინგ ჯორჯიაში“ ასევე გაერთიანდნენ თბილისის საკონცერტო დარბაზი და „ბლექ სი არენა“.