Starring Georgia ₾4.7 მილიონის გამარტივებულ შესყიდვას აცხადებს - რას მოიცავს კონტრაქტი?

კულტურის სამინისტროს დაქვემდებარებაში არსებული შპს „სთარინგ ჯორჯიას“ 4.74 მილიონი ლარის ღირებულების სამუშაოების გამარტივებული შესყიდვის წესით განხორციელებას გეგმავს - ამის შესახებ სახელმწიფო შესყიდვების ეროვნული სააგენტოს ვებგვერდზე გამოქვეყნებული ინფორმაციიდან ხდება ცნობილი.

განაცხადის მიხედვით, შესყიდვა 2026 წლის სეზონისთვის გასართობი პარკების მოსამზადებელ ინფრასტრუქტურულ პროექტებს უკავშირდება. საუბარია შეკვეთილში არსებული პარკების - „ციცინათელას“, „მინიატურების“, „დინოს“ და „მუსიკოსთა“ პარკებში ახალი ატრაქციონების განთავსებისა და მათი უსაფრთხო ექსპლუატაციისთვის საჭირო სამუშაოებზე.

პროექტი მოიცავს ბეტონის საძირკვლების მოწყობას, საინჟინრო კომუნიკაციების განვითარებასა და რეაბილიტაციას, მათ შორის გათბობა-გაგრილების, წყალმომარაგების, წყალარინებისა და ელექტრომომარაგების სისტემებს, ასევე ტერიტორიის კეთილმოწყობას.

განმარტებითი ბარათის თანახმად, გამარტივებული შესყიდვის აუცილებლობა სამუშაოების მოკლე ვადებში შესრულებითა და პროექტების ტექნიკური სირთულით არის დასაბუთებული. დოკუმენტში აღნიშნულია, რომ ატრაქციონები მაღალი რისკის შემცველი ტექნიკური კონსტრუქციებია და მათი მონტაჟი საერთაშორისო სტანდარტებთან შესაბამის საინჟინრო გადაწყვეტილებებს საჭიროებს.

დოკუმენტის მიხედვით, შესყიდვების საერთო სავარაუდო ღირებულება 4 741 240 ლარია. დაფინანსების წყარო 2026 წლის სახელმწიფო ბიუჯეტია.

ცნობისთვის, მთავრობის გადაწყვეტილებით, 2025 წლის ბოლოს შპს „სერვისი-7“ („ციცინათელა“) „სთარინგ ჯორჯიას“ შეუერთდა. მანამდე, 2025 წლის იანვარში, „სთარინგ ჯორჯიაში“ ასევე გაერთიანდნენ თბილისის საკონცერტო დარბაზი და „ბლექ სი არენა“.

ატრაქციონების პარკი „ციცინათელა“ 2007 წელს ბიძინა ივანიშვილის კომპანია „ასოციაცია ატუმ“ ააშენა და სახელმწიფოს გადასცა. 2011-2023 წლებში პარკის მართვას ბიძინა ივანიშვილის ბელიზურ ოფშორთან დაკავშირებული კომპანია „მენეჯმენტ სერვისი“ ახორციელებდა, რაც შემდეგ "ბლექ სი არენას" გადაეცა, ხოლო ამჟამად მისი მართვა „სთარინგ ჯორჯიასთვის“ არის გადაცემული.