სუსმა თბილისში საერთაშორისო კრიმინალური ქსელის 3 წევრი დააკავა - რას ედავება გამოძიება
სახელმწიფო უსაფრთხოების დეპარტამენტის თანამშრომლებმა ცეცხლსასროლი იარაღისა და საბრძოლო მასალის მართლსაწინააღმდეგო გასაღების ფაქტზე უცხო ქვეყნის სამი მოქალაქე დააკავეს. ამის შესახებ ინფორმაციას საქართველოს სახელმწიფო უსაფრთხოების სამსახური ავრცელებს.
უწყების ცნობით, გამოძიებით დადგინდა, რომ დაკავებულები უცხო ქვეყანაში მოქმედი ერთ-ერთი მსხვილი კრიმინალური დაჯგუფების ქსელის წევრები არიან. მათ, გამოძიების ვერსიით, საქართველოში სარეალიზაციოდ უკანონოდ შემოჰქონდათ ცეცხლსასროლი იარაღები და საბრძოლო მასალა. სახელმწიფო უსაფრთხოების დეპარტამენტის თანამშრომლებმა სამი პირი თბილისში, დანაშაულის ჩადენის ადგილზე დააკავეს.
სუსის ინფორმაციით, დაკავებულთა პირადი ნივთების, ავტომობილისა და დროებითი საცხოვრებელი სახლის ჩხრეკის შედეგად ამოღებულია სარეალიზაციოდ გამზადებული უკანონო ცეცხლსასროლი იარაღები, საბრძოლო მასალა, სავარაუდოდ ნარკოტიკული საშუალება და ელექტრონული მოწყობილობები.
უწყების განცხადებით, პირველადი დათვალიერების შედეგად ელექტრონულ მოწყობილობებში აღმოჩენილია სხვადასხვა დანაშაულებრივი ქმედების, მათ შორის განსაკუთრებით დიდი ოდენობით ნარკოტიკული საშუალებების რეალიზაციის ამსახველი ფოტო-ვიდეო მასალა. ამოღებული ნივთმტკიცებები ექსპერტიზაზეა გადაგზავნილი.
როგორც განცხადებაში ვკითხულობთ, სახელმწიფო უსაფრთხოების სამსახური გამოძიებას აგრძელებს საერთაშორისო დანაშაულებრივ ქსელში ჩართული სხვა პირების გამოვლენისა და მათი სისხლისსამართლებრივ პასუხისგებაში მიცემის მიზნით.
გამოძიება საქართველოს სისხლის სამართლის კოდექსის 236-ე მუხლის მე-5 ნაწილით მიმდინარეობს, რაც ცეცხლსასროლი იარაღის ან საბრძოლო მასალის უკანონო გასაღებას გულისხმობს და სასჯელის სახით 9 წლამდე თავისუფლების აღკვეთას ითვალისწინებს.