სვეტიცხოვლის საკათედრო ტაძარში შიო III-ის აღსაყდრების ცერემონია დასრულდა

მცხეთაში, სვეტიცხოვლის საკათედრო ტაძარში, სრულიად საქართველოს ახალარჩეული კათოლიკოს-პატრიარქის, მცხეთა-თბილისის მთავარეპისკოპოსისა და ბიჭვინთისა და ცხუმ-აფხაზეთის მიტროპოლიტ შიო III-ის აღსაყდრების (ინტრონიზაციის) საზეიმო ცერემონია შედგა.

სადღესასწაულო ღვთისმსახურება ტაძარში 10:00 საათზე დაიწყო. საზეიმო ლიტურგიას წმინდა სინოდის წევრები და სხვა მაღალი იერარქიის სასულიერო პირები აღასრულებდნენ.

რიტუალის მიმდინარეობისას ახალ პატრიარქს მართვის სიმბოლოები გადასცეს, კერძოდ საპატრიარქო მიტრა, კუნკულ-ბარტყული (თავსაბურავი), ჯვარ-პანაღია, სამწყემსო კვერთხი.

საქართველოს მართლმადიდებელმა ეკლესიამ 142-ე კათოლიკოს-პატრიარქად საპატრიარქო ტახტის მოსაყდრე, სენაკისა და ჩხოროწყუს მიტროპოლიტი შიო (მუჯირი) გაფართოებულ საეკლესიო კრებაზე გუშინ, 11 მაისს აირჩია..

სვეტიცხოვლის ტაძარში ინტრონიზაციას ესწრებოდნენ საქართველოს მთავრობისა და მინისტრთა კაბინეტის წევრები. სტუმრებს შორის იყო მმართველი პარტიის, „ქართული ოცნების“ დამფუძნებელი ბიძინა ივანიშვილი.

ახალი მამამთავრის არჩევის საკითხი დღის წესრიგში მას შემდეგ დადგა, რაც 2026 წლის 17 მარტს, 93 წლის ასაკში, სრულიად საქართველოს კათოლიკოს-პატრიარქი, უწმინდესი და უნეტარესი ილია II გარდაიცვალა. ილია II საქართველოს ეკლესიას თითქმის ნახევარი საუკუნე მართავდა.