TAKOMEK - თმის მოვლის ხაზი ქართველი დიზაინერისგან | როდიდან იქნება ხელმისაწვდომი ახალი პროდუქტი?

ქართველი დიზაინერი თაკო მექვაბიძე მოდის ინდუსტრიიდან სილამაზის სექტორში გადადის და საკუთარი ბრენდის ფარგლებში თმის მოვლის ახალ ხაზს უშვებს. როგორც დიზაინერმა BMGTV-ის გადაცემა “ქალების ნარატივში” ისაუბრა, პროდუქციის შექმნაზე მუშაობა პარიზში, წამყვან ფრანგულ ლაბორატორიებთან თანამშრომლობით მიმდინარეობდა.

მისი ინფორმაციით, თმის მოვლის ხაზი თავდაპირველად სამ პროდუქტს გააერთიანებს - შამპუნს, კონდიციონერსა და თმის ზეთს. მექვაბიძის განცხადებით, პროდუქცია უკვე თითქმის მზად არის და გაყიდვაში სექტემბერ-ოქტომბერში ჩაეშვება.

ის აღნიშნავს, რომ სილამაზის მიმართულებით გადასვლა მისი მოდის ბიზნესის ბუნებრივი გაგრძელებაა. იდეა საფრანგეთში, საერთაშორისო შოურუმების პერიოდში გაჩნდა, სადაც დიზაინერმა სფეროს წარმომადგენლებთან ახალი კონტაქტები დაამყარა.

„ეს ჩემთვის ძალიან კარგი და განსაკუთრებული რაღაცაა. მოდასთან და ტანსაცმელთან პირდაპირ კავშირში არ არის და ჩემთვისაც ახალი მიმართულებაა. პროდუქტი შეიქმნა პარიზში, წამყვან ლაბორატორიაში, დამზადდა ჩვენი ფორმულა თმის მოვლის შამპუნის, კონდიციონერისა და ზეთის მიმართულებით და ხარისხი არის ძალიან მაღალი“, - განაცხადა თაკო მექვაბიძემ.

დიზაინერის თქმით, პროდუქტის შექმნისას განსაკუთრებული ყურადღება დაეთმო როგორც ფორმულას, ასევე ვიზუალურ იდენტობას. მხოლოდ შეფუთვის დიზაინზე მუშაობა დაახლოებით რვა თვე გაგრძელდა.

„ჩემთვის ესთეტიკა ძალიან მნიშვნელოვანია. მთლიანად შეფუთვის დიზაინზე მე ვიზრუნე - როგორი იქნებოდა ბოთლი, თავსახური, ფერი და ა.შ. მინდოდა, ჩემს ბრენდსა და ამ ხაზს შორის კავშირი ყოფილიყო და ვფიქრობ, ეს შევძელით.

ევროპა ჩემთან ხარისხთან ასოცირდება. საფრანგეთი კი მოდის ინდუსტრიაში ძალიან დიდ მნიშვნელობას ატარებს. სწორედ იქიდან დაიწყო ეს ყველაფერი. ყველა დიდ მოდის სახლს აქვს მსგავსი მიმართულება - სახის, თმის მოვლა და სხვა პროდუქტები“, - განაცხადა დიზაინერმა.