"თბილისი მარიოტი", "ქორთიარდი" და "მოქსი" კახა გველესიანის გარდაცვალების გამო მწუხარებას გამოთქვამენ

„თბილისი მარიოტის“, „ქორთიარდ თბილისისა“ და „მოქსი თბილისის“ გუნდი ბიზნესმენ კახა გველესიანის გარდაცვალების გამო ღრმა მწუხარებას გამოთქვამს და მის ოჯახს, მეგობრებსა და კოლეგებს უსამძიმრებს.

სასტუმროების ერთობლივ განცხადებაში აღნიშნულია, რომ კახა გველესიანის სახელს უკავშირდება ქვეყანაში ტურიზმის სექტორისთვის უმნიშვნელოვანესი პროექტების განხორციელება, მათ შორის აღნიშნული სასტუმროების, ასევე „ექსპო ჯორჯიასა“ და საერთაშორისო თანამედროვე ხელოვნების ბაზრობის, „Tbilisi Art Fair”-ის შექმნა.

კომპანიაში იხსენებენ 2002 წლის ისტორიულ კადრს, რომელიც „თბილისი მარიოტის“ გახსნას ასახავს და სადაც გახსნაზე მომუშავე გუნდთან ერთად კახა გველესიანიც არის აღბეჭდილი. სასტუმროების გუნდის თქმით, ეს პროექტები მისი პროფესიონალიზმისა და საქართველოში თანამედროვე მასპინძლობის კულტურის განვითარებისადმი თავდადების ნაყოფია.

„ბატონი კახა იყო ფართო მსოფლმხედველობისა და მაღალი კულტურის ადამიანი. მისი საქმიანი მიდგომები და დახვეწილი ხედვა, რომლითაც ის სხვადასხვა ბიზნეს თუ კულტურულ ინიციატივებს უძღვებოდა, ჩვენთვის მუდამ შთამაგონებელი იქნება. მან შეძლო შეექმნა პროექტები, რომლებიც დღესაც გადამწყვეტ როლს თამაშობს ქვეყნის საზოგადოებრივ ცხოვრებაში.

ბატონი კახას მიერ დანერგილი ფასეულობები ჩვენი გუნდისთვის მუდამ ღირებული იქნება და ვეცდებით, ღირსეულად გავაგრძელოთ ის საქმე, რასაც მან საფუძველი ჩაუყარა“, - ნათქვამია განცხადებაში.

სასტუმროების გუნდი აღნიშნავს, რომ მათ განსაკუთრებით დააკლდებათ კახა გველესიანი, რომელსაც გამორჩეულად უყვარდა „თბილისი მარიოტი“ და ხშირად სტუმრობდა მას: „ხშირად შეგხვდებოდათ სასტუმროს ლობიში თუ პატიოში, სადაც მისი თბილი და მეგობრული ყოფნა ჩვენი ყოველდღიურობის განუყოფელი ნაწილი იყო“.