თბილისის ახალი აეროპორტის მშენებლობისთვის გრძელდება კვლევითი სამუშაოები - მთავრობის ანგარიში

სამთავრობო პროგრამის შესრულების ანგარიშის თანახმად, თბილისის ახალი საერთაშორისო აეროპორტის მშენებლობისთვის, საანგარიშო პერიოდში, ვაზიანის ყოფილ სამხედრო აეროდრომზე მიმდინარეობდა და გრძელდება საპროექტო კვლევითი სამუშაოები.

დოკუმენტში, რომელიც 2025 წლის ივნისიდან 2026 წლის მაისამდე პერიოდს მოიცავს, აღნიშნულია, რომ თბილისის შოთა რუსთაველის სახელობის საერთაშორისო აეროპორტში მიმდინარეობდა და გრძელდება ტერმინალის გაფართოება, ახალი საჰაერო ხომალდების სადგომი ბაქნისა და დამატებითი სატრანსპორტო საშუალებების საპარკინგე სივრცეების მოწყობა, რის შედეგადაც, თბილისის აეროპორტის გამტარუნარიანობა 5 მლნ მგზავრიდან 10 მლნ მგზავრამდე გაიზრდება.

ანგარიშში ასევე წერია, რომ აქტიურ ფაზაშია ქუთაისის დავით აღმაშენებლის სახელობის საერთაშორისო აეროპორტის ახალი, 3,5 კმ სიგრძის ასაფრენ-დასაფრენი ზოლისა და სხვა სააეროდრომო ინფრასტრუქტურის მშენებლობა. ამასთან, დასკვნით ეტაპზეა თელავის აეროპორტის პროექტის ოპტიმიზაცია, რის შემდეგაც, დაიწყება შესაბამისი სამშენებლო სამუშაოების შესყიდვის პროცესი. ასევე, დასრულებულია მესტიის აეროპორტის ახალი ტერმინალის პროექტზე მუშაობა.

ანგარიშში მოყვანილია სტატისტიკაც და აღნიშნულია, რომ ახლო აღმოსავლეთისა და ყურის რეგიონში არსებული ვითარების გამო შემცირებული ავიარეისების მიუხედავად, 2026 წლის პირველ კვარტალში, საქართველოს საავიაციო სექტორში შენარჩუნდა საჰაერო მიმოსვლის მზარდი დინამიკა. 2026 წლის იანვარ-მარტში საქართველოს აეროპორტები 1 605 500 მგზავრს მოემსახურა, რაც 4.28%-ით აღემატება გასული წლის ანალოგიურ პერიოდში გადაყვანილი მგზავრების რაოდენობას. 2026 წლის პირველ სამ თვეში საქართველოს აეროპორტებში, ჯამში, 7799 რეისი განხორციელდა, რაც წლიურად 8.70%-იანი ზრდაა. ასევე, წელს საქართველოს საავიაციო ბაზარზე ოპერირების უფლება 2 ახალ ავიაკომპანიას მიენიჭა (Norwegian Air Sweden, China Eastern Airlines). ამასთან, საჰაერო მიმოსვლის დაწყების მიზნით, სააგენტოში შესულია რუმინეთის ავიაკომპანია „DAN AIR"- ის განაცხადი, რომელიც 1 ივლისიდან გეგმავს რეგულარული ფრენების შესრულებას ბუქარესტი-თბილისი-ბუქარესტის საჰაერო ხაზზე.