თბილისის წისქვილკომბინატის მფლობელმა, მერიას დემონტაჟის განაცხადით მიმართა
თბილისში, მოსკოვის გამზირზე მდებარე წისქვილკომბინატი შესაძლოა დემონტაჟს დაექვემდებაროს, შესაბამისი განაცხადით ობიექტის მფლობელმა შპს "აგროსისტემებმა" თბილისის მერიის არქიტექტურის სამსახურს მიმართა.
ობიექტი 56,454 კვადრატული მეტრის მიწის ნაკვეთზე მდებარეობს. კომბინატი წარსულში აღმოსავლეთ საქართველოს მთავარ ხორბლის ელევატორს წარმოადგენდა, რომელშიც ასევე წისქვილი და პურის ქარხანა იყო განთავსებული.
თუმცა, ამჟამად კომბინატი აღარ ოპერირებს, მის ნაცვლად კი თბილისისთვის ელევატორის ფუნქციას უფრო ახალი ნაგებობები ასრულებენ.
კომპანიამ წისქვილკომბინატის დემონტაჟის განაცხადით თბილისის მერიას 2026 წლის აპრილში მიმართა, 3 ივლისის დოკუმენტის თანახმად კი კომპანიას პასუხის შესახებ 2026 წლის 17 ივლისამდე ეცნობება.
შპს "აგროსისტემები" საქართველოში რამდენიმე ელევატორს ფლობს, ამჟამად ოპერირებაშია მარნეულის რაიონის სოფელ იაღლუჯასა და კაჭრეთში მდებარე წისქვილკომბინატები. კომპანიის ჯამური აქტივები 39 მილიონ ლარს, წლიური შემოსავლები კი 50 მილიონ ლარს შეადგენს.
ბიზნეს რეესტრის თანახმად, "აგროსისტემების" 100%-ის წილი ეკუთვნის აზერბაიჯანელ ბიზნესმენს ასაბილ გასიმოვს.
BM.GE