თინათინ ბერძენიშვილი საზმაუს დირექტორად მეორე ვადით აირჩიეს

თინათინ ბერძენიშვილი საზოგადოებრივი მაუწყებლის გენერალურ დირექტორად მეორე ვადით, 6 წლით აირჩიეს. მას მხარი სამეურვეო საბჭოს 8 წევრმა დაუჭირა. ის ამ პოსტზე ერთადერთი კანდიდატი იყო.

დღეს ბერძენიშვილმა არხის მომდევნო 6-წლიანი მართვის გეგმა წარადგინა და საბჭოს წევრთა კითხვებს უპასუხა.

მაუწყებლის გენერალური დირექტორის თანამდებობაზე გამოცხადებულ კონკურსში თინათინ ბერძენიშვილი ერთადერთი კანდიდატი იყო, ვინც პირველ ტურში გადავიდა.

ბერძენიშვილმა 2020 წელს პოსტი მას შემდეგ დაიკავა, რაც ყოფილი ხელმძღვანელი ვასილ მაღლაფერიძე ვადაზე ადრე გადადგა, თუმცა დარჩა საზმაუში.

2026 წელს შევსებული ქონებრივი დეკლარაციის მიხედვით, რომელიც 2025 წლის ქონებრივ მდგომარეობას ასახავს, ბერძენიშვილს შარშან საზოგადოებრივი მაუწყებლის გენერალური დირექტორის პოსტზე 130 650 ლარი აქვს მიღებული (თვეში დაახლოებით 10 887 ლარი).

დეკლარაციიდან ასევე ირკვევა, რომ 2025 წლის 8 მაისს თინათინ ბერძენიშვილმა თბილისში, ნინო ჟვანიას ქუჩაზე, 177 კვ.მ ფართობის ბინა შეიძინა. ნასყიდობის ხელშეკრულების მიხედვით, მან უძრავ ქონებაში 220 000 აშშ დოლარი გადაიხადა. იქვე აღნიშნულია, რომ ბინის შესაძენად გამოყენებულია იპოთეკური სესხი. გასული წლის 17 იანვარს ბერძენიშვილმა შეიძინა მსუბუქი ავტომანქანა FORD ESCAPE (2023 წლის მოდელი). ავტომობილის საფასურმა 19 000 ევრო შეადგინა.