TotalEnergies ევროპაში, Shell-ის ქარისა და მზის ენერგიის ბიზნესებს შეიძენს

ფრანგულმა ენერგეტიკულმა გიგანტმა TotalEnergies-მა განაცხადა, რომ Shell-თან შეთანხმებას მიაღწია და კომპანიის ევროპაში არსებული ხმელეთზე განთავსებული განახლებადი ენერგიის ბიზნესებს შეიძენს. გარიგების ფინანსური დეტალები საჯაროდ არ გამჟღავნებულა.

შეთანხმების ფარგლებში, TotalEnergies დაახლოებით 4 გიგავატი სიმძლავრის ელექტროენერგიის წარმოების აქტივებს მიიღებს. ეს, ძირითადად, იტალიასა და ნიდერლანდებში მოქმედ ან მშენებლობის ეტაპზე მყოფ მზისა და ქარის ელექტროსადგურებს, ასევე იტალიაში, დიდ ბრიტანეთსა და ესპანეთში მზის, ქარისა და ბატარეების ენერგიის შენახვის პროექტებს მოიცავს.

ამავე დროს, TotalEnergies-მა განაცხადა, რომ გერმანიაში, ესპანეთში, საფრანგეთსა და პოლონეთში არსებული ქარისა და მზის ენერგიის აქტივების პორტფელის 50%-იან წილს ამერიკულ საინვესტიციო კომპანია KKR-ს მიჰყიდის. გარიგება პორტფელს 1.8 მილიარდ ევროს აფასებს. აღნიშნული პორტფელი დაახლოებით 1.2 გიგავატი სიმძლავრის ელექტროენერგიის წარმოებას მოიცავს.