ტრამპი თურქეთში, NATO-ს სამიტზე მიემგზავრება

აშშ-ის პრეზიდენტი დონალდ ტრამპი თურქეთის დედაქალაქში, NATO-ს სამიტზე მიემგზავრება, რომელიც რუსეთის მიერ უკრაინაზე განხორციელებული ბოლო მასშტაბური თავდასხმებისა და თავდაცვითი ხარჯების გაზრდის თაობაზე ამერიკული მხარის მკაცრი მოთხოვნების ფონზე ჩატარდება.

პარალელურად, ჩრდილოატლანტიკური ალიანსი ირანის წინააღმდეგ წარმოებული სამხედრო კამპანიისა და გრენლანდიის ტერიტორიის გარშემო არსებული ძველი უთანხმოებების გამოც იმყოფება წნეხის ქვეშ. საყურადღებოა, რომ თეთრი სახლის პრესსპიკერის განცხადებით, აშშ-ის ლიდერი სამიტის ფარგლებში ორმხრივ შეხვედრებს თურქეთის პრეზიდენტ რეჯეფ თაიფ ერდოღანთან, უკრაინის პრეზიდენტ ვოლოდიმირ ზელენსკისთან და სირიის პრეზიდენტ აჰმედ ჰუსეინ ალ-შარაასთან გამართავს.

მნიშვნელოვანია ითქვას, რომ სამიტის დაწყებამდე ერთი დღით ადრე, რუსეთის სამხედრო ძალებმა კიევზე ათეულობით რაკეტითა და ასეულობით დრონით მიიტანეს იერიში, რასაც 11 ადამიანის სიცოცხლე ემსხვერპლა. აღნიშნული თავდასხმის წინ კი, დონალდ ტრამპსა და ვლადიმერ პუტინს შორის 90 წუთიანი სატელეფონო საუბარი შედგა, სადაც ამერიკულმა მხარემ ხაზი გაუსვა ორმხრივი თანამშრომლობის კოლოსალურ პოტენციალს უკრაინაში ომის დასრულების შემდეგ.

რაც შეეხება ფინანსურ და სამხედრო ვალდებულებებს, ვაშინგტონი ალიანსის წევრებისგან თავდაცვითი ხარჯების მშპ-ის 5%-მდე დაუყოვნებლივ გაზრდას მოითხოვს.

ცნობისთვის, NATO-ს წევრი ქვეყნები გასულ წელს შეთანხმდნენ, რომ სამხედრო ბიუჯეტს მშპ-ის 5%-მდე 2035 წლისთვის გაზრდიდნენ, თუმცა თეთრი სახლი ამ პროცესის მაქსიმალურ დაჩქარებას ითხოვს. თან, დონალდ ტრამპი ადრეც ხშირად გამოხატავდა უკმაყოფილებას იმის გამო, რომ მოკავშირეებმა ირანთან კონფლიქტის დროს ჰორმუზის სრუტის გასაწმენდად აშშ-ს სამხედრო დახმარება არ გაუწიეს.