ტრამპის განცხადების შემდეგ ნავთობის ფასი დაეცა

პრეზიდენტ დონალდ ტრამპის განცხადებამ ირანთან მოლაპარაკებების დასკვნით ფაზაში გადასვლის შესახებ, გლობალურ ბაზარზე ნავთობის ფასების ვარდნა გამოიწვია.

ინვესტორებში გაჩნდა მოლოდინი, რომ ომი მალე დასრულდება და ჰორმუზის სრუტეში ენერგორესურსების ტრანსპორტირება უახლოეს პერიოდში აღდგება.

არსებული ინფორმაციით, WTI-ის მარკის ნავთობის ფასი 5%-ით შემცირდა და ბარელზე თითქმის $97 შეადგინა. რაც შეეხება Brent-ს, მისი ფასი 104 დოლარის ფარგლებშია, რაც თითქმის 3-დოლარიან კორექციას წარმოადგენს.

ჟურნალისტებთან საუბრისას პრეზიდენტმა აღნიშნა, რომ ვაშინგტონსა და თეირანს შორის შეთანხმება ან შედგება, ან აშშ იძულებული გახდება, მკაცრი ზომები მიიღოს.

როგორც ირკვევა, ირანის სახელმწიფო საინფორმაციო სააგენტო Tasnim-ის ცნობით, თეირანი აშშ-ის მიერ მომზადებულ ახალ სამუშაო ვერსიას ამჟამად განიხილავს, რომელიც ირანის 14-პუნქტიანი გეგმის საპასუხოდ შეიქმნა. მედიის ინფორმაციით, ახალი დოკუმენტი, პრინციპულ დონეზე, ორივე ქვეყნისთვის მისაღებია, თუმცა მსჯელობა დეტალებზე მიმდინარეობს.