ტრამპის კრიპტოკომპანიამ ჯასტინ სანის წინააღმდეგ სარჩელი შეიტანა

დონალდ ტრამპის ოჯახის საკუთრებაში არსებულმა კრიპტოკომპანიამ, World Liberty Financial-მა ჩინელი მილიარდერის, ჯასტინ სანის წინააღმდეგ სასამართლოში სარჩელი შეიტანა.

ფლორიდის შტატის სასამართლოში წარდგენილ დოკუმენტებში კომპანია ბიზნესმენს ცილისწამებასა და პოლიტიკურ ზეწოლაში ადანაშაულებს. სარჩელის მიხედვით, სანმა საკუთარი ფინანსური რესურსი და გავლენა კომპანიის წინააღმდეგ მიმართა, რა დროსაც ცრუ ინფორმაციის გასავრცელებლად ე.წ. ბოტების ქსელი და ინფლუენსერები გამოიყენა.

როგორც ირკვევა, ორ მხარეს შორის დაპირისპირება მას შემდეგ გამწვავდა, რაც World Liberty Financial-მა სანის კუთვნილი აქტივები გაყინა. კომპანიის განმარტებით, აღნიშნული ნაბიჯი „საზოგადოების დასაცავად“ გადაიდგა, რადგან ბიზნესმენის მხრიდან ადგილი ჰქონდა არაკეთილსინდისიერ ქმედებებს, მათ შორის სპეკულაციურ ვაჭრობასა და მესამე პირების სასარგებლოდ ფიქტიური შესყიდვების განხორციელებას. თავის მხრივ, ჯასტინ სანი ბრალდებებს უარყოფს და მიმდინარე დავას უსაფუძვლო პიარკამპანიას უწოდებს.

მნიშვნელოვანია ითქვას, რომ აღნიშნული დავა ოდესღაც პარტნიორულ ურთიერთობებს ასრულებს. არსებული ინფორმაციით, სანმა World Liberty Financial-ში $45 მილიონზე მეტი ინვესტიცია განახორციელა, ხოლო დამატებით მილიონობით დოლარი პრეზიდენტ ტრამპის ე.წ. მიმკოინში ($TRUMP) დააბანდა.