ტრამპის თქმით, ვენესუელური ტერორისტული ორგანიზაციის ლიდერი ლიკვიდირებულია

აშშ-ის პრეზიდენტ დონალდ ტრამპის განცხადებით, ქვეყნის "სწრაფმა და სასიკვდილო კინეტიკურმა" დარტყმამ ჰექტორ რუსტენფორდ გერერო ფლორესი იმსხვერპლა, რომელსაც მან Tren de Aragua-ს ("არაგუას მატარებელი") ბანდის "სამარცხვინო ლიდერი" უწოდა.

შეერთებულმა შტატებმა Tren de Aragua ტერორისტულ ორგანიზაციად გამოაცხადა. გერერო ფლორესს ნიუ-იორკის ფედერალურმა სასამართლომ რეკეტით შეთქმულება და სხვა დანაშაულები წაუყენა ბრალად, მათ შორის ტერორისტების დახმარება იმ დანაშაულებში, რომლებიც ათწლეულზე მეტხანს გრძელდებოდა.

თავდაცვის მინისტრმა პიტ ჰეგსეტმა X-ზე დაწერა, რომ დარტყმა კვირის დასაწყისში ვენესუელაში მდებარე Tren de Aragua-ს ბაზაზე განხორციელდა.

აშშ-ის პროკურორმა ჯეი კლეიტონმა იმ დროს განაცხადა, რომ ბანდა პასუხისმგებელია უამრავ ძალადობრივ აქტზე, გამოძალვასა და ნარკოტრაფიკზე ჩრდილოეთ და სამხრეთ ამერიკაში, ასევე ევროპაში. ტრამპმა კლეიტონი ხუთშაბათს ეროვნული დაზვერვის დირექტორის პოსტზე წარადგინა.

აშშ-ის სახელმწიფო დეპარტამენტი 5 მილიონ დოლარამდე ჯილდოს აწესებდა იმ ინფორმაციისთვის, რომელიც გერერო ფლორესის დაკავებას შეუწყობდა ხელს.

სოციალურ ქსელში გამოქვეყნებულ პოსტში ტრამპმა დაწერა: "Tren de Aragua-ს ტერორისტებს აღარ აქვთ უსაფრთხო თავშესაფარი ვენესუელაში ან სადმე სხვაგან და ჩემი ხელმძღვანელობით ჩვენ ვიპოვით ამ სასტიკ მკვლელებსა და ნარკობარონებს ნებისმიერ დროს, ნებისმიერ ადგილას და გავაგზავნით ჯოჯოხეთის ფსკერზე, სადაც მათი ადგილია".

ჰეგსეტმა კი განაცხადა, რომ "ეს ოპერაცია ხაზს უსვამს აშშ-ისა და ვენესუელას საერთო ვალდებულებას, ებრძოლონ ნარკოტერორისტებს და არ დაუშვან მათთვის უსაფრთხო თავშესაფრის არსებობა ჩვენს ნახევარსფეროში".

ტრამპმა ბანდის წინააღმდეგ არაერთი განსაკუთრებული ზომა მიიღო, მათ შორის დარტყმების სერია მცირე ნავებზე, რომლებსაც მისი ადმინისტრაცია ამერიკაში ნარკოტიკების კონტრაბანდაში ადანაშაულებს. აღმოსავლეთ წყნარ ოკეანესა და კარიბის ზღვაში აშშ-ის მიერ ნავებზე განხორციელებულ დარტყმებს სულ მცირე 207 ადამიანი ემსხვერპლა მას შემდეგ, რაც სექტემბრის დასაწყისში ტრამპის ადმინისტრაციამ ე.წ. "ნარკოტერორისტების" წინააღმდეგ ოპერაციები დაიწყო.

ტრამპი და მისი ადმინისტრაციის წარმომადგენლები Tren de Aragua-ს აშშ-ის ზოგიერთ ქალაქში არსებული ძალადობისა და უკანონო ნარკოვაჭრობის გაღვივებაში მუდმივად ადანაშაულებენ. პრეზიდენტი თვეების განმავლობაში ამტკიცებდა, რომ Tren de Aragua ვენესუელის პრეზიდენტ ნიკოლას მადუროს კონტროლის ქვეშ მოქმედებდა. იანვარში აშშ-მა მადურო ვენესუელიდან გამოიყვანა და ნარკოდანაშაულებზე ბრალი წაუყენა.

ბანდის ზუსტი ზომა უცნობია. ქვეყნები, სადაც ვენესუელელი მიგრანტების დიდი პოპულაციაა (მათ შორის პერუ და კოლუმბია), ჯგუფს რეგიონში ძალადობრივ ტალღაში ადანაშაულებენ. მიუხედავად ამისა, ლათინური ამერიკის მასშტაბით დანაშაულის მკვლევარი ანალიტიკური ცენტრის, InSight Crime-ის ცნობით, კოლუმბიის, ცენტრალური ამერიკისა და ბრაზილიის სხვა კრიმინალური ორგანიზაციებისგან განსხვავებით, Tren de Aragua-ს საერთაშორისო საზღვრებზე კოკაინის კონტრაბანდაში მასშტაბური მონაწილეობა არ აქვს.

ტრამპი მეორე ვადით არჩევნებში იმიგრაციისა და დანაშაულის წინააღმდეგ მკაცრი ზომების მიღების პირობით იბრძოდა. მიუხედავად იმისა, რომ გამოკითხვები ეკონომიკის მართვის კუთხით მისი რეიტინგის ვარდნას აჩვენებს, იმიგრაცია ტრამპის ყველაზე ძლიერ პოლიტიკად რჩება - იუწყება AP-NORC-ის საზოგადოებრივ საქმეთა კვლევის ცენტრი.