ტრამპმა ნავთობკომპანიებთან ჰორმუზის ბლოკადის მრავალთვიანი გაგრძელება განიხილა

აშშ-ის პრეზიდენტი დონალდ ტრამპი ქვეყნის უმსხვილესი ენერგეტიკული კომპანიების წარმომადგენლებს შეხვდა, სადაც ჰორმუზის სრუტის შესაძლო მრავალთვიანი ბლოკადის გეგმა განიხილეს. თეთრი სახლის ინფორმაციით, შეხვედრის მთავარი თემა ნავთობის მოპოვება, ფიუჩერსული ბაზრები, გადაზიდვები და ბუნებრივი აირი იყო.

Chevron-ის წარმომადგენლობის განცხადებით, კომპანიის აღმასრულებელმა დირექტორმა, მაიკ ვირთმა პრეზიდენტთან გლობალურ ბაზარზე არსებულ იმ რყევებზე ისაუბრა, რომელიც ირანის წინააღმდეგ მიმდინარე საომარმა მოქმედებებმა გამოიწვია.

თეთრ სახლში გამართულ სამიტს, რომლის შესახებ ინფორმაცია თავდაპირველად Axios-მა გაავრცელა, ფინანსთა მინისტრი სკოტ ბესენტი, პრეზიდენტის ადმინისტრაციის ხელმძღვანელი სუზი ვაილსი და ჯარედ კუშნერიც ესწრებოდნენ.

მედიაში გავრცელებული ინფორმაციით, ენერგეტიკული სექტორის ლიდერებმა დადებითად შეაფასეს ტრამპის მიერ აშშ-ის ენერგეტიკული დომინაციისთვის გადადგმული ნაბიჯები და პრეზიდენტის პოლიტიკას მხარდაჭერა გამოუცხადეს.

შიდა ბაზარზე ფასების დასასტაბილურებლად აშშ-ის ადმინისტრაციამ ე.წ. „ჯონსის აქტზე“ 90-დღიანი შეღავათი უკვე აამოქმედა, რაც უცხოური დროშის ქვეშ მცურავ გემებს ამერიკულ პორტებს შორის ნავთობპროდუქტების გადაზიდვის უფლებას აძლევს.

ამასთან, პრეზიდენტმა „თავდაცვითი წარმოების აქტი“ გამოიყენა, რომლის საფუძველზეც პენტაგონსა და ენერგეტიკის დეპარტამენტს შიდა რესურსების შესყიდვისა და წარმოების გაფართოების უფლებამოსილება მიენიჭათ.