ტრამპმა უკრაინას Patriot-ის რაკეტების წარმოების უფლება მისცა

აშშ-ის პრეზიდენტმა დონალდ ტრამპმა უკრაინისთვის Patriot-ის საჰაერო თავდაცვის სისტემების საზენიტო რაკეტების ადგილობრივი წარმოების ლიცენზიის მინიჭების საბოლოო გადაწყვეტილება მიიღო. ამის შესახებ უკრაინის პრეზიდენტმა ვოლოდიმირ ზელენსკიმ ჟურნალისტებთან საუბრისას განაცხადა.

„ბოლო შეხვედრაზე პრეზიდენტმა ტრამპმა ხაზგასმით აღნიშნა: „დიახ, მე მივიღე საბოლოო გადაწყვეტილება - უკრაინა მიიღებს Patriot-ის რაკეტების წარმოების ლიცენზიას“, - განაცხადა ზელენსკიმ.

ამ გადაწყვეტილებას წინ უძღოდა ვაშინგტონის ხანგრძლივი მერყეობა. ივლისში დონალდ ტრამპმა აღნიშნა, რომ ლიცენზიის გადაცემა „ფანტასტიკური იდეა“ იქნებოდა, თუმცა მოგვიანებით პოზიცია შეცვალა და განაცხადა, რომ ქვეყანას მსგავსი ნებართვის გაცემამდე „დიდი სიფრთხილე“ მართებდა.

ცნობისთვის, კიევი Patriot-ის რაკეტების მწვავე დეფიციტს განსაკუთრებით მას შემდეგ განიცდის, რაც თებერვალში აშშ-სა და ირანს შორის დაწყებული სამხედრო კონფლიქტის გამო, აღნიშნული საჰაერო თავდაცვის სისტემების მარაგების ნაწილი ახლო აღმოსავლეთში გადამისამართდა. უკრაინის პრეზიდენტის შეფასებით, ზამთრის პერიოდის გადასალახად ქვეყანას აშშ-ის საზენიტო რაკეტების მარაგის 5%-ის მიღება სჭირდება, ხოლო რუსული ბალისტიკური ჭურვების სრულად განადგურებისთვის - 10%.

ამასთან, უკრაინული მხარის განცხადებით, ლიცენზიის მიღების მიუხედავად, საწარმოო სიმძლავრეების გამართვასა და ადგილობრივი წარმოების გაშვებას წელიწადზე მეტი დასჭირდება, რაც კიევის გადაუდებელ საჭიროებებს უახლოეს მომავალში ვერ დააკმაყოფილებს.

ცნობისთვის, Patriot-ის საჰაერო თავდაცვის კომპლექსი ერთადერთ სისტემად რჩება, რომელსაც რუსული ბალისტიკური რაკეტების ეფექტიანი მოგერიება შეუძლია.