ტრამპთან დაკავშირებული სტარტაპი სამხედრო ჰუმანოიდი რობოტების შექმნას გეგმავს

ამერიკულმა სტარტაპმა Foundation Future Industries-მა მძიმე მრეწველობისა და სამხედრო სფეროსთვის ავტონომიური ჰუმანოიდი რობოტების შექმნა დაიწყო. კომპანიის აღმასრულებელი დირექტორის, სანკაეტ პატჰაკის განცხადებით, ტექნოლოგია იმ დონეს აღწევს, რომ მას უკვე ადამიანისთვის სახიფათო სამუშაოების შესრულება შეუძლია.

როგორც ირკვევა, 2024 წელს დაფუძნებული საწარმოს მიზანს რობოტების საყოფაცხოვრებო და მომსახურების სფეროს ნაცვლად, თავდაცვის სექტორში ინტეგრირება შეადგენს. არსებული ინფორმაციით, აშშ-ის მოქმედი პრეზიდენტის მეორე შვილი, ერიკ ტრამპი კომპანიის მთავარ სტრატეგიულ მრჩევლად დაინიშნა, რაც დემოკრატმა სენატორმა ელისაბედ უორენმა კორუფციულ გარიგებად შეაფასა.

პარალელურად, კომპანიამ Phantom MK-1 მოდელის ორი ერთეული უკრაინაში საპილოტე დემონსტრაციისთვის გაგზავნა, რაც საბრძოლო მოქმედებების ზონაში ჰუმანოიდი რობოტების გამოყენების პირველ შემთხვევას წარმოადგენს. სტარტაპის განმარტებით, მიმდინარე გამოცდები რობოტის მიერ ტვირთის გადატანის პოტენციალს ადასტურებს, თუმცა ამ კონკრეტულ მოდელს შეზღუდული ენერგოეფექტურობა აქვს და მას მხოლოდ 20 კილოგრამამდე ტვირთის აწევა შეუძლია. მნიშვნელოვანია ითქვას, რომ მიმდინარე წელს კომპანია უკრაინაში გაუმჯობესებული Phantom 2 მოდელის გაგზავნასაც გეგმავს.

ამასთან, სტარტაპმა აშშ-ის არმიისგან, სამხედრო-საზღვაო და სამხედრო-საჰაერო ძალებისგან ინსპექტირების, ლოგისტიკისა და იარაღის მართვის მიმართულებით კვლევითი კონტრაქტები მიიღო, რომელთა ჯამური ღირებულება $24 მილიონს შეადგენს.

სტარტაპი მიმდინარე წელს წარმოების ათასობით ერთეულამდე გაზრდას აპირებს, ხოლო აშშ-ის არმიასთან ფრონტის ხაზზე ტესტირებას მომავალი 18 თვის განმავლობაში დაიწყებს.