წალკაში ნედლი რძის გადამმუშავებელს წარმოება შეუჩერდა - სეს

წალკაში ნედლი რძის გადამმუშავებელს წარმოება შეუჩერდა. მიზეზი არალეგალური ოპერირება და წარმოებასთან კრიტიკული შეუსაბამობებია.

სურსათის ეროვნული სააგენტოს ინფორმაციით, ქვემო ქართლის დეპარტამენტის ინსპექტორებმა, სახელმწიფო კონტროლის ფარგლებში ინდივიდუალური მეწარმე გ. მ. -ის (მისამართი: წალკა, სოფელი ახალშენი) კუთვნილი რძის გადამმუშავებელი საწარმო შეამოწმეს.

"ინსპექტირებისას ობიექტზე დაფიქსირდა კრიტიკული შეუსაბამობები, სურსათის უვნებლობის სავალდებულო მოთხოვნების და ჰიგიენური ნორმების დარღვევა. ამასთან, ბიზნესოპერატორი სააგენტოს სავალდებულო აღიარებისა და ეკონომიკურ საქმიანობათა რეესტრში რეგისტრაციის გარეშე საქმიანობდა.

კანონმდებლობის შესაბამისად, მეწარმე დაჯარიმდა და საწარმოო პროცესი შეუჩერდა", - ნათქვამია სეს-ის გავრცელებულ ინფორმაციაში.

მომხმარებლის ინტერესების დაცვის მიზნით, სურსათის ეროვნული სააგენტო სახელმწიფო კონტროლს მთელი ქვეყნის მასშტაბით ყოველდღიურ რეჟიმში ახორციელებს.