წელს იშვიათი დაავადებების პროგრამის ბიუჯეტი ₾71.3 მილიონია - როგორ იცვლებოდა დაფინანსება წლების მიხედვით?

იშვიათი დაავადებების მქონე და მუდმივ ჩანაცვლებით მკურნალობას დაქვემდებარებულ პაციენტთა მკურნალობაზე მიმდინარე წელს ბიუჯეტიდან 71 მლნ 26 ათასი ლარის დახარჯვა იგეგმება.

პროგრამა 2015 წლიდან მოქმედებს და მიზანია იშვიათი დაავადებების მქონე და მუდმივ ჩანაცვლებით მკურნალობას დაქვემდებარებულ პაციენტთა ჯანმრთელობის მდგომარეობის გაუმჯობესება, სამედიცინო მომსახურებისა და მედიკამენტებზე ფინანსური ხელმისაწვდომობის გაზრდის გზით.

მოსარგებლეები არიან:

• იშვიათი დაავადებების მქონე 18 წლამდე ასაკის ბავშვთა ამბულატორიული მომსახურებითა და იშვიათი დაავადებების მქონე და მუდმივ ჩანაცვლებით მკურნალობას დაქვემდებარებულ 18 წლამდე ასაკის ბავშვთა სტაციონარული მომსახურებით მოსარგებლე საქართველოს მოქალაქეები;

• ჰემოფილიით და სისხლის შედედების სხვა მემკვიდრული პათოლოგიებით დაავადებულ ბავშვთა და მოზრდილთა ამბულატორიული და სტაციონარული მომსახურებითა და იშვიათი დაავადებების მქონე პაციენტების სპეციფიკური მედიკამენტებით მოსარგებლე საქართველოს მოქალაქეები და საქართველოში მუდმივად მცხოვრები მოქალაქეობის არმქონე პირები ან საქართველოში მუდმივად მცხოვრები უცხო ქვეყნის მოქალაქეები.

აღსანიშნავია, რომ სახელმწიფო პროგრამის ბიუჯეტი წელს თავდაპირველად 70 მლნ ლარი იყო, ზრდა კი მის გაფართოებას მოჰყვა. პროგრამას იშვიათი ნერვ-კუნთოვანი დაავადების (დიუშენის კუნთოვანი დისტროფია, ბეკერის კუნთოვანი დისტროფია, სპინალური კუნთოვანი ატროფია) მქონე მოქალაქეები დაემატნენ. პროგრამა ფარავს როგორც ამბულატორიულ, ისე სტაციონარულ მომსახურებას.

პროგრამის დაფინანსება წლიდან წლამდე მზარდია, გასული წლების ფაქტობრივად დახარჯული თანხები ასეთია:

• 2022 წელი - 21.1 მლნ ლარი; • 2023 წელი - 32.2 მლნ ლარი; • 2024 წელი - 42.7 მლნ ლარი; • 2025 წელი - 55 მლნ ლარი; • 2026 წელი - გეგმა 71.3 მლნ ლარი.