წლის პირველ ნახევარში აზერბაიჯანიდან გაზის იმპორტი გაიზარდა

აზერბაიჯანის ენერგეტიკის სამინისტროს ინფორმაციით, წლის პირველ ნახევარში საქართველომ 1.2 მლრდ მ3 გაზი იყიდა აზერბაიჯანიდან. გასული წლის შესაბამის პერიოდთან შედარებით, აზერბაიჯანიდან იმპორტირებული გაზის მოცულობა 100 მლნ მ3-ით არის გაზრდილი.

ბოლო წლებში აზერბაიჯანიდან გაზის იმპორტი მცირდება, ამ დანაკლისს კი საქართველო რუსეთიდან ანაზღაურებს. ასე მაგალითად, სემეკის წლიური ანგარიშის მიხედვით, 2025 წელს საქართველომ აზერბაიჯანიდან 2.27 მლრდ მ³ გაზი მიიღო. აქედან 666 მლნ მ³ იმპორტი, ხოლო 1,371 დამატებითი და ოფციური ხელშეკრულებით მიღებული გაზია. გასულ წელთან შედარებით აზერბაიჯანიდან მიღებული გაზის მოცულობა 1.6%-ით არის შემცირებული.

სემეკის მიერ გამოქვეყნებული სტატისტიკა ასევე აჩვენებს, რომ რუსეთიდან გაზის იმპორტი კვლავ მზარდია. 2025 წელს რუსეთიდან საქართველომ 886 მლნ მ³ გაზი იყიდა, რაც 12%-ით აღემატება გასული წლის მაჩვენებელს.