“ტურიზმის ადმინისტრაციის ხელმძღვანელი ტურისტულმა სექტორმა უნდა აირჩიოს” - ახალგაზრდა გიდების ასოციაცია

ახალგაზრდა გიდების ასოციაციის ხელმძღვანელი ინიციატივით გამოდის, რომ ტურიზმის ადმინისტრაციის ხელმძღვანელის თანამდებობა არჩევითი იყოს და მას თავად ტურიზმის სექტორი ირჩევდეს. ლაშა ბერეკაშვილი მიიჩნევს, რომ ეს ბიზნესის წინაშე ანგარიშვალდებულებას გაზრდის.

“პირველ რიგში ტურიზმის ადმინისტრაციის ძირეული რეფორმირებაა საჭიროა, მათ შორის ტურიზმის დეპარტამენტის თავმჯდომარე უნდა იყოს არჩევითი, ეს უნდა აირჩიოს ადგილობრივმა ტურისტულმა სექტორმა, აღრიცხულმა და სერტიფიცირებულმა სექტორმა. შემდეგ ამ არჩეულმა პირმა უნდა გაატაროს ისეთი რეფორმები, რომელიც იქნება წამოსული სექტორიდან.

ჩვენ ახლა ვსაუბრობთ თემაზე [ტურიზმის შესახებ კანონში ცვლილებები], რაც სექტორს არ მოუთხოვია. ჯერჯერობით სექტორს სხვა პრიორიტეტები და სხვა საჭიროებები აქვს, რასაც ასეთი კანონები არ პასუხობს.

როდესაც იქნება არჩევითი ასეთი ორგანოს ხელმძღვანელი, ის უკვე ანგარიშვალდებული იქნება სექტორის მიმართ და იმ რეფორმებს, იმ ღონისძიებებს გაატარებს, რომელიც სექტორის საჭიროებებს უპასუხებს”,-განაცხადა ლაშა ბერეკაშვილმა BM.GE-სთან ინტერვიუში.