უაქციზო სასმელი, თამბაქო, ოქროს ნივთები - 2025 წელს უკანონო ბრუნვიდან ₾40 მილიონის საქონელია
2025 წელს უაქციზო საქონლის წარმოება-რეალიზაციისა და საბაჟოზე საქონლის უკანონო მიმოქცევიდან ჯამში 40 მილიონი ლარის საქონელია ამოღებული.
პროკურატურის ანგარიშის მიხედვით, აქედან დიდი ნაწილი უაქციზო სასმელსა და თამბაქოზე მოდიოდა.
„სსკ-ის მე-200 და 214-ე მუხლებით გათვალისწინებული დანაშაულების ჩადენისთვის უკანონო ბრუნვიდან ამოღებული საქონლის ჯამურმა ღირებულებამ 40 მილიონ ლარს გადააჭარბა. მათ შორის, ამოღებულია 6 მილიონ ლარზე მეტი ღირებულების უაქციზო თამბაქოს ნაწარმი და 11 მილიონ ლარზე მეტის ღირებულების უაქციზო ალკოჰოლური სასმელი. ასევე, მსჯავრდებულებს სახელმწიფოს სასარგებლოდ უსასყიდლოდ ჩამოერთვათ 6 მილიონ ლარზე მეტი ღირებულების ძვირფასეულობა, მათ შორის, ოქროს ნივთები“, - ნათქვამია პროკურატურის ანგარიშში.
დოკუმენტის მიხედვით, მარკირებას დაქვემდებარებული საქონლის აქციზური მარკის გარეშე უკანონო ბრუნვა ძირითადად განპირობებულია საქართველოს ოკუპირებული ტერიტორიებიდან უაქციზო საქონლის შემოდინებით და ამ საქმიანობიდან მისაღები მაღალი ეკონომიკური სარგებლის ინტერესით, რაც ხელს უწყობს ორგანიზებული დანაშაულებრივი ჯგუფების ჩამოყალიბებასა და მათ საქმიანობაში მოსახლეობის სხვადასხვა სოციალური ფენის წარმომადგენელთა ჩართულობას.
წინა წელთან შედარებით ყველა შემაჯამებელი გადაწყვეტილების მაჩვენებელი გაზრდილია: 2025 წელს სსკ-ის მე-200 მუხლით (მარკირებას დაქვემდებარებული აქციზური საქონლის აქციზური მარკის გარეშე გამოშვება, შენახვა, რეალიზაცია ან გადაზიდვა) სისხლის სამართლებრივი დევნა დაიწყო 295 პირის მიმართ“.
ამასთან, საქართველოს პროკურატურის ანგარიშის მიხედვით, საქართველოს საბაჟო საზღვარზე საქონლის არალეგალური მიმოქცევის წინააღმდეგ ბრძოლის ეფექტიანობა 2025 წელს უპრეცედენტოა და წინა წლებთან შედარებით გაზრდილია.
2025 წელს სსკ-ის 214-ე მუხლით, რაც საქართველოს საბაჟო საზღვარზე საქონლის გადაადგილებასთან დაკავშირებული წესის დარღვევას გულისხმობს, სისხლის სამართლებრივი დევნა 235 პირის მიმართ დაიწყო.