Uber-მა Delivery Hero-ს შესყიდვა გადაწყვიტა

გუშინ Delivery Hero-ს აქციების ფასი 10%-ზე მეტით გაიზარდა, რაც Financial Times-ის მიერ გავრცელებულ იმ ინფორმაციას უკავშირდება, რომლის მიხედვითაც, ამერიკული Uber-ი გერმანული ონლაინ-მიწოდების სერვისის შესყიდვას განიხილავს.

აღსანიშნავია, რომ Delivery Hero-მ შაბათს გავრცელებულ განცხადებაში დაადასტურა Uber-ისგან თითო აქციაში 33 ევროს ოდენობის შეთავაზების მიღება, რაც კომპანიის საბაზრო კაპიტალიზაციას 10 მილიარდ ევროზე მეტად აფასებს.

მნიშვნელოვანია ითქვას, რომ Financial Times-ის ინფორმაციით, Uber-ის დირექტორთა საბჭო შაბათს ბერლინში ბაზირებული კომპანიის შესყიდვის გაუმჯობესებული პირობების განსახილველად შეიკრიბა. Uber-ის მხრიდან ეს ნაბიჯი მას შემდეგ გადაიდგა, რაც Delivery Hero-ს ერთ-ერთმა მსხვილმა აქციონერმა აქამდე წარმოდგენილი შეთავაზება უარყო.

ცნობისთვის, ამ გარიგების წარმატებით დასრულება კვების მიწოდების სექტორში კონსოლიდაციას გაზრდის, ვინაიდან გასულ წელს DoorDash-მა Deliveroo შეიძინა, Prosus-მა კი Just Eat-ი შეისყიდა.