უფასო პარკინგი, აუზი ბულვარში, უკანონო ობიექტების დემონტაჟი... |რა სიახლეებით ხვდება ტურისტებს აჭარა?
უფასო საპარკინგე სივრცეები, ახალი ძელსკამები, ისტორიული აუზის აღდგენა ბულვარში, უკანონო ობიექტების დემონტაჟი - ეს იმ სიახლეების არასრული ჩამონათვალია, რაც ბათუმში 20 ივნისს ოფიციალურად გახსნილ საზაფხულო ტურისტულ სეზონს ახლავს.
„ბათუმი არის სრულად მზად საზაფხულო ტურისტული სეზონისთვის განახლებული ინფრასტრუქტურით, ახალი ტურისტული პროდუქტებით, განახლებული სერვისებით, შესაძლებლობებით და განსაკუთრებული სტუმარმასპინძლობით”, - განაცხადა აჭარის მთავრობის თავმჯდომარე ზურაბ პატარაძემ ტურისტული სეზონის გახსნისადმი მიძღვნილ ოფიციალურ ღონისძიებაზე, რომლისთვისაც 0.5 მლნ დაიხარჯა.
BMG-მ აჭარის ავტონომიური რესპუბლიკის მთავრობიდან გამოითხოვა ინფორმაცია, რას მოიცავს განახლებული ინფრასტრუქტურა და სერვისები, რაზედაც ზურაბ პატარაძე საუბრობდა.
აჭარის მთავრობაში ამბობენ, რომ რეგიონში დასრულდა და აქტიურად მიმდინარეობს როგორც საგზაო, ისე ტურისტული, სპორტული და რეკრეაციული ინფრასტრუქტურის განვითარების არაერთი პროექტი, რაც მიზნად ისახავს როგორც ადგილობრივი მოსახლეობის, ისე ვიზიტორებისთვის უსაფრთხო, კომფორტული და თანამედროვე გარემოს შექმნას.
საგზაო და მუნიციპალური ინფრასტრუქტურა
აჭარის მთავრობის ინფორმაციით,რეგიონში საგზაო ინფრასტრუქტურის განვითარებისთვის 52.2 მილიონ ლარზე მეტი დაიხარჯა. რეაბილიტაცია ჩაუტარდა 11 საავტომობილო გზას, მოეწყო 22 კილომეტრი ასფალტ-ბეტონის საფარი და აშენდა/რეაბილიტირდა 10 ხიდი.
ბათუმში საგზაო ინფრასტრუქტურის განახლებისთვის 57.3 მილიონი ლარი გამოიყო. რეაბილიტაცია დასრულდა მამია ვარშანიძის, ხახულის, ივანე მესხისა და მაჭახელას ქუჩებზე, ასევე შოთა რუსთაველის ქუჩის ორ მონაკვეთზე.
დასრულდა 11 ლოკაციაზე ქვაფენილების მოწყობა, სამუშაოები კი დამატებით 7 ქუჩაზე გრძელდება. ქალაქს ასევე შეემატა გრიგოლ ლორთქიფანიძისა და ზღვისპირის ქუჩების დამაკავშირებელი ახალი გზა.