უკრაინა ბიომეთანის წარმოების იწყებს - რა არის ბიოგაზი?

უკრაინის მთავრობამ ბიომეთანის წარმოების განვითარების პროგრამა დაამტკიცა, რომელიც 2035 წლამდე პერიოდს მოიცავს. პროექტის მთავარი მიზანი ქვეყნის ბიოგაზის მსხვილ მწარმოებლად გარდაქმნა და ევროკავშირში მისი ექსპორტის დაწყებაა. ენერგეტიკის მინისტრის, დენის შმიჰალის განმარტებით, ბიომეთანის წარმოების გაფართოება ევროპულ სახელმწიფოებს რუსულ ნახშირწყალბადებზე დამოკიდებულების შემცირებაში დაეხმარება.

სამთავრობო პროგრამა ახალი ქარხნების მშენებლობას, არსებული ობიექტების მოდერნიზაციას, ბიზნესისთვის საინვესტიციო სტიმულების შექმნასა და რეგულაციების გამარტივებას ითვალისწინებს. კერძოდ, იგეგმება მწარმოებლებისთვის გაზგამანაწილებელ ქსელებთან მიერთების პროცედურების გამარტივება.

დენის შმიჰალის განცხადებით, უკრაინის ამბიციური სამიზნე მაჩვენებელი 2030 წლისთვის წლიურად 1 მილიარდი კუბური მეტრი ბიომეთანის წარმოებაა, მომდევნო ხუთ წელიწადში კი ეს მოცულობა 2.1 მილიარდ კუბურ მეტრამდე გაიზრდება.

პროექტის განხორციელების საწყის ეტაპზე ექსპლუატაციაში რვა ახალი ქარხნის გაშვებაა დაგეგმილი. აღსანიშნავია, რომ მიმდინარე წლის მარტში უკრაინაში კომპანია Teofipol Energy Company-ის კუთვნილი ბიომეთანის ქარხანა უკვე ამოქმედდა. წლის ბოლომდე კი ქვეყანაში რიგით მეშვიდე მსგავსი ობიექტის გაშვებაა მოსალოდნელი, რაც სექტორის განვითარების დინამიკაზე მიუთითებს.

ცნობისთვის, ბიომეთანი ბუნებრივი აირის განახლებადი ალტერნატივაა, რომელიც ორგანული ნივთიერებების ფერმენტაციის შედეგად მიიღება და არა მიწისქვეშა წიაღისეული საბადოებიდან მოპოვებით. პროცესი გარემოსთვის ნაკლებად ზიანის მომტანია და ენერგოუსაფრთხოების განმტკიცების მნიშვნელოვან ინსტრუმენტს წარმოადგენს.