უკრაინა და აშშ რუსეთს საჰაერო ზავს შესთავაზებენ - მხარეებმა პოზიციები შეაჯერეს

უკრაინა და ამერიკის შეერთებული შტატები მოსკოვისთვის წარსადგენი ახალი სამშვიდობო გეგმის პუნქტებზე შეთანხმდნენ. როგორც ირკვევა, მხარეების მთავარი შეთანხმება საბრძოლო მოქმედებების ზონაში საჰაერო ზავის გამოცხადების ინიციატივაა. ვაშინგტონში მიიჩნევენ, რომ რუსეთის ტერიტორიაზე უკრაინული დარტყმების გაფართოების ფონზე, კრემლი საჰაერო შეტევების ნაწილობრივ შეწყვეტას დათანხმდება.

უკრაინული გამოცემა Kyiv Independent-ის ცნობით, ვოლოდიმირ ზელენსკიმ აშშ-ის პრეზიდენტის სპეციალურ წარმომადგენლებთან, სტივ ვიტკოფთან და ჯარედ კუშნერთან სატელეფონო საუბარი უკვე გამართა. მოლაპარაკების დროს ამერიკელმა დიპლომატებმა უკრაინის პრეზიდენტს განახლებული ჩარჩო დოკუმენტი გააცნეს, რის შემდეგაც მხარეები შემდგომ შეხვედრაზე შეთანხმდნენ. კერძოდ, ვოლოდიმირ ზელენსკი დონალდ ტრამპს 28 ივლისს, სენატორ ლინდსი გრემის დაკრძალვის ცერემონიის შემდგომ შეხვდება.

პარალელურად, ცნობილი ხდება, რომ აშშ-ის პრეზიდენტის წარმომადგენლები ივლისის ბოლოს ან აგვისტოს დასაწყისში რუსეთში გაემგზავრებიან.

როგორც Kyiv Indipendent-ი წერს, მხარეთა შორის კომპრომისის მიღწევის შანსს ფრონტზე არსებული ვითარება ზრდის. უკრაინა რუსეთის სიღრმეში ლოგისტიკურ და სამხედრო ობიექტებზე იერიშებს აძლიერებს, ხოლო მოსკოვი უკრაინულ ქალაქებზე სარაკეტო იერიშებს აგრძელებს.

ცალკე გამოწვევაა, რომ კიევს Patriot-ის საჰაერო თავდაცვის სისტემების რაკეტების დეფიციტი აქვს, რაც, გამოცემაში გამოქვეყნებული სტატიის ავტორის შეფასებით, ჰაერში ცეცხლის შეწყვეტის შეთანხმებას ორმხრივად მომგებიანს ხდის. კრემლის პრესსპიკერმა დიმიტრი პესკოვმა განაცხადა, რომ რუსეთი მოლაპარაკებების პროცესისთვის ღია რჩება.

შეგახსენებთ, უკრაინისა და რუსეთის პრეზიდენტების პირდაპირი შეხვედრის ორგანიზება აქამდე ყველა ჯერზე უშედეგოდ დასრულდა. კრემლი შეხვედრის ნეიტრალურ ქვეყანაში გამართვაზე უარს ამბობს და ვოლოდიმირ ზელენსკის რუსეთში ჩასვლას სთხოვს, რასაც ოფიციალური კიევი კატეგორიულად არ ეთანხმება.