უკრაინა რუსეთის მიერ გამოცხადებულ „გამარჯვების დღის“ ზავს არ დაიცავს

უკრაინის პრეზიდენტმა, ვოლოდიმირ ზელენსკიმ განაცხადა, რომ კიევი თავს მოსკოვის მიერ ცალმხრივად გამოცხადებული ზავის შესრულებისგან თავისუფლად მიიჩნევს. როგორც ირკვევა, ქვეყნის ლიდერმა აღნიშნული გადაწყვეტილება მას შემდეგ მიიღო, რაც რუსულმა მხარემ უკრაინის მიერ მანამდე შეთავაზებული ცეცხლის შეწყვეტის რეჟიმი დაარღვია. ზელენსკიმ კრემლი იმ 1,820 დარღვევაში დაადანაშაულა, რაც საარტილერიო დაბომბვებს, სახმელეთო იერიშებსა და საჰაერო თავდასხმებს მოიცავდა. აღსანიშნავია, რომ თავის მხრივ რუსეთის თავდაცვის უწყებამ სამშაბათს უკრაინის ტერიტორიაზე რამდენიმე შეტევის განხორციელება დაადასტურა.

"დღეის მდგომარეობით, ვაცხადებთ, რომ რუსულმა მხარემ ცეცხლის შეწყვეტის რეჟიმი დაარღვია. ჩვენი სამხედროებისა და დაზვერვის საღამოს მოხსენებების შედეგებზე დაყრდნობით, განვსაზღვრავთ ჩვენს შემდგომ ქმედებებს", - განაცხადა ზელენსკიმ.

მნიშვნელოვანია ითქვას, რომ მანამდე მხარეებმა ერთმანეთისაგან დამოუკიდებელი ცეცხლის შეწყვეტის რეჟიმები გამოაცხადეს და ნებისმიერი დარღვევისთვის მკაცრი საპასუხო ზომების მიღება დააანონსეს. ვლადიმერ პუტინმა ზავი შაბათს დაგეგმილი იმ სამხედრო აღლუმის გამო დააწესა, რომელიც კრემლისთვის წელს საკვანძო მნიშვნელობის მოვლენად მიიჩნევა. სწორედ ამ მიზეზით, რუსული მხარე კიევს დაემუქრა, რომ ღონისძიების ჩაშლის მცდელობის შემთხვევაში უკრაინის დედაქალაქის ცენტრზე მასშტაბურ სარაკეტო დარტყმას განახორციელებს.

რაც შეეხება უკრაინის პოზიციას, ზელენსკიმ აღნიშნა, რომ მოსკოვს ამჟამად უკრაინული დრონების შიში აქვს. აქვე მან დასძინა, რომ კრემლს კიევისთვის ზავის შესახებ ოფიციალურად არ მიუმართავს. მისივე განცხადებით, ყოველდღიური მკვლელობების ფონზე რუსეთის მხრიდან საჯარო დღესასწაულების აღნიშვნა გაუმართლებელია. საყურადღებოა, რომ უკრაინული მხარე შემდგომი მოქმედებების შესახებ გადაწყვეტილებას დღეს საღამოს მიიღებს.

ცნობისთვის, მოსკოვში მეორე მსოფლიო ომში გამარჯვების 81-ე წლისთავისადმი მიძღვნილი ღონისძიება წელს შეზღუდულად ჩატარდება. აღლუმში მძიმე სამხედრო ტექნიკის ნაცვლად მხოლოდ ქვეითი დანაყოფები მიიღებენ მონაწილეობას.