„თუ რუსეთი ინფრასტრუქტურაზე იერიშებს შეწყვეტს, ჩვენც შევაჩერებთ დარტყმებს“ - ზელენსკი
უკრაინის პრეზიდენტი ვოლოდიმირ ზელენსკი რუსეთის ენერგეტიკულ ინფრასტრუქტურაზე იერიშების შეჩერების მზადყოფნას გამოთქვამს, თუკი მოსკოვი ანალოგიური ნაბიჯის გადადგმას დათანხმდება.
როგორც ირკვევა, უკრაინულმა მხარემ პარტნიორებს შესაბამისი სამშვიდობო გეგმა შესთავაზა, თუმცა კიევში ეჭვობენ, რომ კრემლი ნაკისრ ვალდებულებებს არ შეასრულებს და ამ ზავს აზრი არ ექნება.
აღნიშნული განცხადებით ზელენსკიმ აშშ-ის პრეზიდენტ დონალდ ტრამპის მიერ Truth Social-ზე გამოქვეყნებული ცნობა დააზუსტა. ამერიკის ლიდერის მტკიცებით, მხარეებმა ენერგოობიექტებზე დარტყმების შეწყვეტის შესახებ შეთანხმებას უკვე მიაღწიეს და ის მალე გასაჯაროვდება.
ტრამპის შეფასებით, დაპირისპირებული მხარეების მიერ კრიტიკულ ინფრასტრუქტურაზე იერიშების შეჩერება შესაძლოა მშვიდობისკენ გადადგმული პირველი დიდი ნაბიჯი გახდეს. ამასთან, ტრამპმა ზელენსკის მოუწოდა, რუსულ ნავთობგადამამუშავებელ ქარხნებზე იერიშები შეწყვიტოს, რადგან ეს გლობალურ ბაზარზე დიზელის დეფიციტს იწვევს.
უკრაინის პრეზიდენტის განმარტებით, შეთანხმება ხანგრძლივ შედეგზე უნდა იყოს ორიენტირებული და რუსეთის მიერ საწვავზე ზეწოლის დროებით შესამსუბუქებლად არ უნდა იქნეს გამოყენებული. წინააღმდეგ შემთხვევაში, უკრაინა გაორმაგებული ძალებით აღადგენს შეტევებს რუსეთის ინფრასტრუქტურის წინააღმდეგ.
BM.GE
წყარო: bm.ge