უკრაინამ Wildbarries-ის კიდევ ერთ საწყობს დაარტყა

7 აგვისტოს უკრაინულმა დრონებმა ეკატერინბურგში მდებარე Wildberries-ის საწყობზე იერიში მიიტანეს, რამაც ობიექტზე ხანძარი გამოიწვია.

თავდასხმა ერთობლივი კომპანია RWB-ის საწყობის წინააღმდეგ განხორციელდა, რომელიც Wildberries-ის ლოგისტიკურ ოპერაციებს მართავს. კომპანიაში განაცხადეს, რომ თანამშრომლების ევაკუაცია იერიშამდე განხორციელდა, ხოლო გზავნილები სხვა საწყობებში გადაამისამართეს.

ინციდენტის შედეგად დაშავებულების შესახებ ინფორმაცია არ გავრცელებულა. ურალის ფედერალურ ოლქში რუსეთის პრეზიდენტის წარმომადგენლის, არტიომ ჟოგას განცხადებით, ტერიტორიიდან დაახლოებით 800 ადამიანის ევაკუაცია განხორციელდა.

თავდასხმა უკრაინის საზღვრიდან 2 000 კილომეტრზე მეტი მანძილის მოშორებით მოხდა, რაც რუსეთის სიღრმეში Wildberries-ის ინფრასტრუქტურაზე მორიგი დარტყმაა.

სვერდლოვსკის ოლქის გუბერნატორმა დენის პასლერმა ღამით დრონების თავდასხმის საფრთხის შესახებ განგაში გამოაცხადა, თუმცა ზარალის შესახებ დეტალები არ დაუზუსტებია. ხელისუფლებამ ასევე ეკატერინბურგის კოლცოვოს აეროპორტში დროებით ფრენები შეზღუდა, თუმცა შეზღუდვები დილისთვის უკვე მოიხსნა.

ბოლო კვირებში უკრაინული დრონების სამიზნე Wildberries-ის ლოგისტიკური ცენტრები სულ უფრო ხშირად ხდება. რუსული გამოცემა Agentstvo-ს ინფორმაციით, ივლისის შუა რიცხვებიდან მოყოლებული, უკრაინული შორ მანძილზე მოქმედი დრონების იერიშების შედეგად, Wildberries-ის 20-ზე მეტი საწყობი დაზიანდა.

4 აგვისტოს უკრაინულმა თავდასხმამ ტულის ოლქში მდებარე Wildberries-ის ერთ-ერთ უდიდეს ლოგისტიკურ საწყობში ხანძარი გამოიწვია, რის გამოც ობიექტმა მუშაობა შეაჩერა.

გასულ კვირას სააგენტო Reuters-ი იუწყებოდა, რომ რუსეთის მთავრობა Wildberries-ის ფინანსური მხარდაჭერის ზომებს განიხილავს მას შემდეგ, რაც განმეორებითმა დარტყმებმა მისი რამდენიმე ლოგისტიკური ცენტრი დააზიანა. შემოთავაზებული ზომები სახელმწიფო სესხებს, საგადასახადო შეღავათებსა და სუბსიდიებს კომპანიისა და დაზარალებული გამყიდველებისთვის მოიცავს.

უკრაინელმა ოფიციალურმა პირებმა მანამდე განაცხადეს, რომ Wildberries-ი რუსული არმიის მომარაგებაში მისი სავარაუდო როლისა და სახელმწიფო VTB ბანკთან ფინანსური კავშირების გამო შეირჩა სამიზნედ. კომპანია სამხედრო ლოგისტიკაში მონაწილეობას უარყოფს.