უკრაინული იერიშის შედეგად, რუსეთში „კირიშის“ ნავთობქარხანამ მუშაობა შეაჩერა

უკრაინული უპილოტო საფრენი აპარატების თავდასხმის გამო, რუსეთის სიდიდით მეორე ნავთობგადამამუშავებელმა საწარმომ, „კირიშიმ“, ნავთობის გადამუშავება შეაჩერა. Reuters-ის ინფორმაციით, იერიშის შედეგად ობიექტის ოთხი ძირითადი დანადგარიდან სამი დაზიანდა.

არსებული ინფორმაციით, დაზიანებული დანადგარები ნებისმიერი ქარხნის ფუნქციონირებისთვის კრიტიკულად მნიშვნელოვანია, რის გამოც საწარმოს საქმიანობის გაგრძელება ამ ეტაპზე შეუძლებელია. პარალელურად, დაზიანებულია რამდენიმე დამხმარე აგრეგატიც.

საყურადღებოა, რომ ქარხნის მფლობელ კომპანია Surgutneftegaz-ში კომენტარის გაკეთებაზე უარი განაცხადეს, ხოლო სპეციალისტებისთვის დაზიანებული ერთეულების აღდგენის ზუსტი ვადები ჯერჯერობით უცნობია.

აღსანიშნავია, რომ უკრაინის სპეცსამსახურების მიერ განხორციელებული ეს იერიში რუსეთის ნავთობის ინდუსტრიაზე ბოლო ორი თვის განმავლობაში მიტანილი მასშტაბური შეტევების ნაწილია. თავდასხმები ხორციელდება როგორც მილსადენებსა და პორტებზე, ისე ტანკერებსა და გადამამუშავებელ სიმძლავრეებზე. რუსული მხარე აღნიშნულ ქმედებებს ტერორიზმად აფასებს, კიევი კი აცხადებს, რომ ქვეყანა თავდაცვის უფლებას იყენებს.

შეგახსენებთ, „კირიშის“ ქარხანა, რომელიც უკრაინის საზღვრიდან დაახლოებით 800 კილომეტრითაა დაშორებული, მიმდინარე წელს უკვე რამდენჯერმე გახდა თავდასხმის სამიზნე. საწარმოს წლიური სიმძლავრე 20 მილიონ ტონას შეადგენს, რაც რუსეთის ნავთობგადამუშავების მთლიანი მოცულობის დაახლოებით 10%-ია.