უკრაინულმა დრონებმა ვოლგოგრადში Lukoil-ის ნავთობგადასამუშავებელ ქარხანას დაარტყეს

13 ნოემბრის ღამეს უკრაინულმა ძალებმა დრონებით რუსეთის ქალაქ ვოლგოგრადში მდებარე Lukoil-ის მსხვილ ნავთობგადასამუშავებელ ქარხანას შეუტიეს.

ვოლგოგრადის ოლქის გუბერნატორის, ანდრეი ბოჩაროვის განცხადებით, ქალაქზე მასირებული იერიში განხორციელდა და სამხრეთ ინდუსტრიულ ზონაში ხანძარი გაჩნდა.

უკრაინული მონიტორინგის არხის, Exilenova+-ის ცნობით, ლუკოილის Волгограднефтепереработка-ს ნავთობგადასამუშავებელ ქარხანაში აფეთქებები დაფიქსირდა და ხანძარიც გაჩნდა. ცნობისთვის: ეს საწარმო რუსეთის სიდიდით მეორე ნავთობმწარმოებელი კომპანიის, Lukoil-ის ერთ-ერთი უმსხვილესი აქტივია და მისი წლიური სიმძლავრე 15 მილიონ ტონა ნედლ ნავთობს შეადგენს.

შეგახსენებთ, ეს დარტყმა უკრაინის იმ კამპანიის ნაწილია, რომელიც რუსული არმიის მომმარაგებელი ინფრასტრუქტურის მოშლასა და მოსკოვის ენერგეტიკული შემოსავლების შემცირებას ისახავს მიზნად.

ცნობისთვის, უკრაინის საზღვრიდან დაახლოებით 400 კილომეტრში მდებარე ამ ნავთობგადასამუშავებელ ქარხანას უკრაინულმა ძალებმა 2 ოქტომბერსაც შეუტიეს.