უნგრეთის პარლამენტმა პრეზიდენტის გადასაყენებლად საკონსტიტუციო ცვლილება დაამტკიცა

უნგრეთის პარლამენტმა დაამტკიცა საკონსტიტუციო ცვლილება, რომელიც მიზნად პრეზიდენტ ტამაშ შულიოკის თანამდებობიდან გადაყენებას ისახავს. როგორც ირკვევა, 199-წევრიან საკანონმდებლო ორგანოში ინიციატივას მხარი 139-მა დეპუტატმა დაუჭირა, ხოლო ექვსი წინააღმდეგ წავიდა.

ქვეყნის მოქმედი პრემიერ-მინისტრის, პეტერ მადიარის შეფასებით, ტამაშ შულიოკმა საკუთარი მოვალეობა ვერ შეასრულა და ორბანის კაბინეტის ანტიდემოკრატიულ ნაბიჯებს ხელი არ შეუშალა. მთავრობის მეთაურის განცხადებით, მმართველმა გუნდმა ამ გადაწყვეტილებით ორბანის სამართლებრივი სისტემის ტრანსფორმაცია საბოლოოდ დაიწყო. მადიარის თქმით, ამ ნაბიჯით ქვეყანამ დახურა ის ეპოქა, რომლის დასასრულებლადაც მათ მოსახლეობისგან მკაფიო მანდატი მიიღეს.

შულიოკის გადასაყენებლად მიღებული გადაწყვეტილების პარალელურად მთავრობამ მიიღო ახალი დოკუმენტი, რომელიც მიზნად "კანონის უზენაესობაზე დაფუძნებული დემოკრატიის აღდგენას" ისახავს. საკანონმდებლო ცვლილების ფარგლებში ახალი სასამართლო რეფორმები გატარდება და ორბანის მმართველობის პირობებში არსებული ფინანსური დარღვევების გამოსაძიებლად სპეციალური უწყება შეიქმნება. კანონპროექტით უმაღლესი საკანონმდებლო ორგანოს დეპუტატებისთვის უფლებამოსილების 12-წლიანი ლიმიტიც განისაზღვრა.

პრეზიდენტმა დოკუმენტს ხელი ხუთი დღის განმავლობაში უნდა მოაწეროს, წინააღმდეგ შემთხვევაში კი პარტია Tisza მის წინააღმდეგ იმპიჩმენტის პროცედურას დაიწყებს.