უნგრეთმა ორბანის მიერ დაწყებული სისხლის სამართლის საერთაშორისო სასამართლოს დატოვების პროცესი შეაჩერა
უნგრეთის პარლამენტმა დაამტკიცა კანონმდებლობა, რომელიც ქვეყანას სისხლის სამართლის საერთაშორისო სასამართლოში (ICC) წევრობას უნარჩუნებს. ამით ვიქტორ ორბანის მთავრობის მიერ 2025 წელს მიღებული გადაწყვეტილება გაუქმდა.
ორბანის მთავრობამ ICC-დან გასვლა იმ მოტივით გადაწყვიტა, რომ სასამართლო "პოლიტიზებული" გახდა. მოქმედმა პრემიერ-მინისტრმა პეტერ მადიარმა, რომელმაც გასულ თვეში საპარლამენტო არჩევნებში ორბანი დაამარცხა, პირობა დადო, რომ შეაჩერებდა გასვლის პროცესს და უნგრეთს ICC-ში დატოვებდა.
სისხლის სამართლის საერთაშორისო სასამართლო ორ ათწლეულზე მეტი ხნის წინ შეიქმნა იმ პირთა გასასამართლებლად, რომლებსაც ბრალად ომის დანაშაულები, დანაშაულები კაცობრიობის წინააღმდეგ და გენოციდი ედებათ.
ორბანის მთავრობამ ICC-დან გასვლის შესახებ 2025 წლის აპრილში, ისრაელის პრემიერ-მინისტრის, ბენიამინ ნეთანიაჰუს უნგრეთში სახელმწიფო ვიზიტით ჩასვლიდან მალევე განაცხადა. ეს იყო ნეთანიაჰუს იშვიათი მოგზაურობა საზღვარგარეთ, რითაც მან ICC-ის დაპატიმრების ორდერი დაარღვია. უნგრეთმა უარყო ნეთანიაჰუს დაპატიმრების იდეა და ორდერს "თავხედური" უწოდა.
ოთხშაბათს მიღებულ კანონში ნათქვამია: "საერთაშორისო მშვიდობისა და უსაფრთხოების ინტერესებიდან გამომდინარე და ადამიანის უფლებების დასაცავად... აუცილებელია, მათ, ვინც ჩაიდინა უმძიმესი საერთაშორისო დანაშაულები, საერთაშორისო სასამართლოს წინაშე აგონ პასუხი".
კანონში აღნიშნულია, რომ უნგრეთის მონაწილეობის შენარჩუნება ICC-ში აუცილებელია.