უნგრეთმა უკრაინას ჩამორთმეული ფული და ოქრო დაუბრუნა

უნგრეთმა უკრაინას სახელმწიფო ბანკიდან მიმდინარე წლის დასაწყისში ჩამორთმეული მილიონობით ევრო და ოქრო დაუბრუნა. პრეზიდენტმა ვოლოდიმირ ზელენსკიმ აღნიშნულ ნაბიჯს ორ ქვეყანას შორის ურთიერთობების გაუმჯობესებისკენ გადადგმული მნიშვნელოვანი ეტაპი უწოდა.

როგორც ირკვევა, ბუდაპეშტმა კიევს €35 მლნ ($40 მლნ.) და 9 კილოგრამი ოქრო გადასცა. ცნობისთვის, დასახელებული აქტივები უკრაინულ სახელმწიფო ბანკ Oschadbank-ს ეკუთვნის. მისმა თავმჯდომარემ, იური კაციონმა უნგრულ მხარეს კონსტრუქციული მიდგომისთვის მადლობა გადაუხადა.

მნიშვნელოვანია ითქვას, რომ ურთიერთობების დათბობა უნგრეთში ხელისუფლების ცვლილებას და პრემიერ-მინისტრ ვიქტორ ორბანის არჩევნებში დამარცხებას უკავშირდება. მომავალი პრემიერი, პეტერ მადიარი ბრიუსელთან თანამშრომლობის გაღრმავებას და ევროკავშირის ფონდებზე წვდომის აღდგენას აქტიურად ცდილობს. ამასთან, უნგრეთმა უკრაინისთვის განკუთვნილ €90-მილიარდიან სესხზე ვეტო უკვე მოხსნა.

პარალელურად, ნავთობსადენ „დრუჟბასთან“ დაკავშირებული დაძაბულობაც შემცირდა, რადგან აპრილის ბოლოდან უნგრეთისთვის ნავთობის მიწოდება უკრაინის გავლით განახლდა.

რაც შეეხება აქტივების ჩამორთმევის ისტორიას, დაპირისპირება მარტის დასაწყისში მას შემდეგ დაიწყო, რაც უნგრეთის ხელისუფლებამ ავსტრიიდან უკრაინისკენ მიმავალი კოლონა ბუდაპეშტში გააჩერა. ინციდენტის დროს სამართალდამცავებმა შვიდი უკრაინელი დააკავეს, რასაც კიევის მხრიდან მწვავე რეაქცია მოჰყვა. უკრაინის საგარეო საქმეთა მინისტრი ანდრიი სიბიჰა ბუდაპეშტს „სახელმწიფო ტერორიზმსა და რეკეტში“ ადანაშაულებდა.